काठमाडौं । आईसीसी विश्वकप क्रिकेट लिग–२ अन्तर्गतको त्रिकोणात्मक एक दिवसीय अन्तराष्ट्रिय सिरिजमा नेपालले तेस्रो खेलमा शुक्रबार अमेरिकासँग खेल्दैछ । खेल ओमानको अल अमिरात क्रिकेट मैदानमा नेपाली समयअनुसार अपरान्ह ४ः१५ बजे शुरु हुनेछ ।
नेपाललाई अमेरिकाविरुद्ध लगातार चार खेल हराएर इतिहास रच्ने सुनौलो अवसर हुनेछ । नेपालले लिग–२ को पहिलो खेलमा गत सोमबार अमेरिकालाई ५ विकेटले हराएको थियो । यही कारण पनि नेपालको मनोबल उच्च छ ।
नेपालले नेपालमै भएको लिग–२ का दुवै खेलमा अमेरिकालाई हराएको थियो । लगातार चार जित निकाल्न नेपाल आतुर छ । अर्कातिर अमेरिकालाई पनि बदला लिने अवसर छ ।
तर अमेरिका कमजोर बन्दै गएको छ । बिहीबार राति भएको खेलमा अमेरिका ओमानसँग ४ विकेटले पराजित भएको छ ।
नेपालले विश्वकप छनोटमा छानिनका लागि अहिलेदेखि नै निरन्तर जित ननिकाले छनोटको सम्भावना टाढिने छ । त्यसका लागि पनि नेपाललाई जित जरुरी छ ।
यसअघि नेपाल सिरिजको दोस्रो खेलमा ओमानसँग पराजित भएको थियो ।
सात टोलीमध्ये शीर्ष तीन टोली विश्वकप छनोटमा छानिने छन् ।
अंक तालिका
अंक तालिकामा ओमान १२ खेलबाट २० अंकसहित शीर्ष स्थानमा छ । १४ खेलबाट १२ अंकको अमेरिका दोस्रो स्थानमा छ ।
८ खेलबाट ९ अंकको स्कटल्याण्ड तेस्रो, ७ खेलबाट ८ अंकको नामिबिया चौथो, ७ खेलबाट ७ अंकको युएई पाँचौं, ६ खेलबाट ६ अंकको नेपाल छैटौं तथा ८ खेलबाट अंकविहीन पपुवा न्यूगिनी पुछारमा छ ।
