साइकल खरिदमा अनियमितताको आरोप लागेका मुख्यमन्त्री राउतले भने - खरिद नियम सङ्गत
निरञ्जन कुमार साह,
प्रकाशित २०७८ असोज २० बुधबार
1.7k
Shares
जनकपुरधाम । प्रदेश नम्बर दुईका मुख्यमन्त्री लालबाबु राउतले 'बेटी पढाऊ, बेटी बचाउ' कार्यक्रमको लागि खरिद गरेको साइकल सार्वजनिक खरिद ऐन अनुसार नियम सङ्गत रहेको बताएका छन् । बुधबार प्रदेश सभाको बैठकमा विपक्षी दलका प्रदेश सभा सदस्यहरूले उठाएको प्रश्नको जवाफ दिँदै मुख्यमन्त्री राउतले इ-विडिङ्ग मार्फत खरिद गरिएको साइकलमा कुनै अनियमितता नरहेको दावी गरे।
मुख्यमन्त्री राउतले साइकल खरिदमा अनियमितता भएको भनी विभिन्न पक्षबाट उठाइएको प्रश्न कपोलकल्पित र पूर्वाग्रही मात्र रहेको बताए । दुई चरणमा खरिद गरिएको साइकल मध्ये पहिलो चरणमा ओम सत्य साइ प्राली पर्साले रु ५ हजार ७ सय , सान्यो इन्टरनेशनल जेभी काठमाडौँ रु ७ हजार ५ सय ७६ , द डिजाइनर्स नेपाल जे भि भरतपुर रु ६ हजार ८ सय ३१ , म्याप इन्टरप्रिन्युर्स काठमाडौँले रु ६ हजार १ सय ५०, र विकास जेनरल ट्रेडिङ्ग रु ८हजार ५ सय १ कवोल गरेकोमा न्युन्तम कबोल गर्ने ओम सत्य साइ प्राली पर्सालाई टेण्डर दिइएको तथ्याङ्क मुख्यमन्त्री राउतले प्रस्तुत गरेका छन् ।
त्यसै गरि दोस्रो चरणमा गरिएको टेन्डरमा ओम सत्य साइ प्राली पर्सा ले रु ७ हजार ५ सय , सान्यो इन्टरनेशनल जेभी काठमाडौँ रु ७ चार सय ७५ कबोल गरेको तथा म्याप हेलिक्स जेभिको कबोलमा प्राविधिक त्रुटि देखिएकोले न्यूनतम कबोल गर्ने सान्यो इन्टरनेशनल जेभी काठमाडौँ सँग सम्झौता गरि खरिद गरिएको बताए।
सार्वजनिक खरिद ऐन अनुरूप इ-विडिङ्ग मार्फत खरिद गरिएको साइकलमा अनियमितता भएको भन्नु आफैमा हास्यास्पद, कपोलकल्पित र पूर्वाग्रही रहेको मुख्यमन्त्री राउतको कथन थियो ।
