प्रदेशसभामा राउतलाई सोनलको प्रश्न - भ्रष्टाचार छानबिन गर्दा सङ्घीयता कसरी धरापमा पर्छ ?
निरञ्जन कुमार साह,
प्रकाशित २०७८ असोज २० बुधबार
1.8k
Shares
जनकपुरधाम। लोकतान्त्रिक समाजवादी पार्टी (लोसपा) संसदीय दलका नेता जितेन्द्र सोनलले भ्रष्टाचार छानबिन गर्न अख्तियारले छापा मार्दैमा सङ्घीयता समाप्त नहुने बताएका छन् ।
बुधवारको प्रदेशसभामा बोल्दै सांसद सोनलले ‘बेटी बचाउ, बेटी पढाऊ’ अभियान अन्तरगत साइकल खरिदमा भ्रष्टाचार भएको छैन भने प्रदेश मामिला समितिलाई कागजात दिन किन आनाकानी गरेको भन्दै थप प्रश्न गरे ।
समितिले पटक पटक कागजात मागे पनि मुख्यमन्त्री राउतले थाहा नभएको जस्तो गरेकोमा नेता सोनलले आपत्ति जनाए ।
लोसपाका संसदीय दलको नेता सोनलले मुख्यमन्त्री लालबाबु राउतमाथि प्रश्न गर्दै भने, ‘अख्तियारले सुरु गरेको छानबिन प्रभावित पार्न सङ्घीयता समाप्त पार्ने षड्यन्त्र भयो भनेर अफवाह नफैलाउनुस् । भ्रष्टाचार छानबिन गर्दा कसरी सङ्घीयता धरापमा पर्छ ?’
नेता सोनलले साइकल खरिदमा भ्रष्टाचार भएको जिकिर गर्दै अख्तियारलाई छानबिनका लागि मार्ग प्रशस्त गर्न मुख्यमन्त्री राउतसँग अनुरोध गरे । उनले करिब ८० दिनपछि बसेको प्रदेशसभा बैठकमा मुख्यमन्त्री राउतले छोरी बिमा कार्यक्रम बन्द भएको भनेर जानकारी गराएकोमा आपत्ति जनाएका छन् ।
