चौथो बेलबारी गोल्डकप : आयोजकलाई हराउँदै धनकुटा सेमिफाइनलमा

विवेक मिश्र,

प्रकाशित २०७८ कार्तिक १४ आइतबार

लक्ष्मीमार्ग । रारा फुटबल क्लब धनकुटाले आयोजक डाँगीहाट यूथ क्लबलाई दुई एक गोल अन्तरले पराजित गर्दै सेमिफाइनलको यात्रा निश्चित गरेको छ ।

चौथो अन्तर्राष्ट्रिय आमन्त्रण बेलबारी गोल्डकप फुटबल प्रतियोगिता अन्तर्गत आइतबार बेलबारी–११ स्थित लक्ष्मी मार्गमा भएको खेलमा रारा फुटबल क्लब धनकुटाले आयोजकलाई हराउन सफल भएको हो ।

निकै प्रतिस्पर्धात्मक रहेको खेलमा मध्यान्तर अघि एकाएक गोल बराबरीमा रहेको थियो । दोस्रो हाफको थप समयमा राराका योगेश गुरुङले एकल प्रयासमा गरेको गोल नै खेलको निर्णायक गोल बन्न पुग्यो ।

मध्यान्तर अघि १०औँ मिनेटमा राराका ग्लोरीले कर्ण लिम्बुको पासमा गोल गर्दै टिमको खाता खोलेका थिए । ३०औँ मिनेटमा आयोजकका सन्तोष न्यौपानेले प्रहार गरेको बलले जाली चुम्न सफल भयो ।

आयोजकले विपक्षीको पोस्टमा दबाब सिर्जना गर्न सकेता पनि आयोजकका कासिम राईले प्रहार गरेको बल पटक पटक बहिरीयो ।

खेलको म्यान अफ द म्याच रारा फुटबल क्लब धनकुटाका बुद्ध चेम्जोङ भए उनले नगद ५ हजार ५ सय पुरस्कार पाए । सोमबार हुने पहिलो सेमिफाइनल खेल हिमालयन शेर्पा क्लब काठमाण्डौं र रोलिङ क्लब धुलाबारी झापाबिच प्रतिस्पर्धा हुनेछ ।