-
-
-
-
डोटी । डोटीमा मोटरसाइकलको ठक्करबाट एक जना महिलाको मृत्यु भएको छ । जिल्लाको शिखर नगरपालिका वडा नम्बर ७ सेटीगाउँकी ६५ वर्षीया कृष्णा देवी कार्कीको मृत्यु भएको प्रहरीले जनाएको छ ।
मोटरसाइकलको ठक्करबाट घाइते भएकी कार्कीलाई उपचारको लागि शैलेश्वरी अस्पताल दिपायल ल्याइएको र त्यहाँ उपचार सम्भव नभएपछि थप उपचारका लागि धनगढी लैजाने क्रममा बाटोमा उनको मृत्यु भएको जिल्ला प्रहरी कार्यालय डोटीका सहायक प्रवक्ता प्रहरी निरीक्षक रवीन्द्र चन्दले हाम्रा कुरालाइ जानकारी दिए ।
कार्कीलाई दिपायलबाट डडेलधुरा जादै गरेको २५ वर्षीय धुव्र कडायतले चलाएको लु ६५ प १५२० नम्बरको मोटरसाइकलले के.आई.सिंहाजमार्ग अन्तर्गत शिखर नगरपालिका-८ गोपघाटमा बुधवार दिउँसो करिब १ बजे ठक्कर दिएको थियो ।
दिपायल सिलगढी नगरपालिका २ पुन्यपाटाका मोटरसाइकल चालक कडायत र मोटरसाइकललाई नियन्त्रणमा लिएको प्रहरीले बताएको छ । आवश्यक अनुसन्धान भइरहेको प्रहरीको भनाई छ ।
