-
-
-
-
पोखरा । कास्कीको अन्नपूर्ण गाउँपालिका र मादी गाउँपालिकाबाट आजदेखि मतदाता नामावली संकलन शुरु भएको छ ।
आजदेखि मंसिर २६ गतेसम्म उक्त स्थानबाट नामावली संकलन गरिने निर्वाचन आयोगले जनाएको छ ।
यस्तै, पुस १० गतेबाट माछापुच्छ्रे गाउँपालिका र रुपा गाउँपालिकाबाट नामावली संकलन गरिने गण्डकी प्रदेश निर्वाचन अधिकारी हुमनाथ पराजुलीले जानकारी दिए ।
यी दुई पालिकामा पनि १० दिन नामावली संकलन गरिने उनले बताए । उनका अनुसार निर्वाचनको मिति घोषणा भएपछि नामावली संकलन कार्य स्थगित हुनेछ ।
मतदाता नामावलीमा १६ वर्ष उमेर पुगेका नेपाली नागरिकले नाम दर्ता गराउन सक्नेछन् ।
निर्वाचन कार्यालयले अन्नपूर्ण र माछापुच्छ्रेमा दुई/दुई जना कर्मचारी खटाएको छ।
नेपाली नागरिकता प्राप्त नेपाली नागरिकताको प्रमाणपत्रको आधारमा, बसाईँसराई तथा बिवाह गरिएका आएकाले पनि मतदाता नामावलीमा नाम दर्ता गराउन सक्नेछ ।
कोही नछुटुन्, कोही नदोहोरिउन् भन्ने नाराका साथ मतदाता नामावली संकलन कार्य अघि बढाइएको निर्वाचन अधिकारी पराजुलीले बताए ।
उनका अनुसार निर्वाचन आयोगको कार्यालय, जिल्ला प्रशासन कार्यालय र इलाका प्रशासन कार्यालय लेखनाथबाट पनि मतदाता नामावली संकलन भइरहेको बताए ।
आयोगले आफूलाई पायक पर्ने स्थानमा गएर नामावली दर्ता गर्न सबैमा आग्रह गरेको छ ।
