मकवानपुरको भैसेबाट एक क्विन्टल ८३ किलो गाँजासहित एक पक्राउ

रविन्द्र गौतम,

प्रकाशित २०७८ पुष २७ मंगलबार

मकवानपुर । मकवानपुर प्रहरीले एक क्विन्टल ८३ किलो लागूऔषध गाँजासहित एक जनालाई पक्राउ गरेको छ ।

मकवानपुरको भीमफेदी गाउँपालिका भैसेस्थित प्रहरी चेकपोस्टबाट उक्त परिमाणको गाँजासहित थाहा नगरपालिका वडा नम्बर २ निवासी ३० वर्षीय रामचन्द्र सिंतान पक्राउ परेका छन् ।

विशेष सूचनाको आधारमा सोमबार साँझ करिब ६ बजेको समयमा जिल्ला प्रहरी कार्यालय मकवानपुरबाट खटिएको विशेष टोली र प्रहरी चौकी भैंसे मकवानपुरबाट खटिएको प्रहरी चेकिङ टोलीले भिमफेदी गाउँपालिका-२ भैंसे स्थित चेक पोष्टमा सवारी साधन चेकजाँच गर्ने क्रममा मकवानपुरको पालुङ तर्फबाट हेटौडा आउँदै गरेको प्रदेश ३-०१-००२२ च ३५५६ नम्बरको पिकअप गाडीमा चेकजाँच गर्ने क्रममा गाँजा फेला परेको प्रहरीले जनाएको छ ।

गाँजा फेला परेपछि प्रहरीले चालक स्याङ्तानलाई गाडीसहित नियन्त्रणमा लिएको जिल्ला प्रहरी कार्यालय मकवानपुरले जनाएको छ । प्रहरीका अनुसार यसबारे थप अनुसन्धान भइरहेको छ ।