काठमाडौं । शहीद स्मारक ‘ए’ डिभिजन लिग फुटबल अन्तर्गत आज सम्पन्न खेलमा मछिन्द्र फुटबल क्लब विजयी भएको छ ।
त्रिपुरेश्वरस्थित दशरथ रङ्गशालामा भएको खेलमा मच्छिन्द्रले बिग्रेड ब्वाइज क्लबलाई ४-० गोलअन्तरले पराजित गरेको हो । मछिन्द्रका लागि विमल घर्ती मगरले दुई तथा रेजिन सुब्बा र अभिषेक रिजालले एक एक गोल गरे ।
ब्रिगेड ब्वाइजले मच्छिन्द्रलाई पहिलो हाफमा गोलरहित बराबरीमा रोके पनि दोस्रो हाफमा भने सकेन् । खेलको ५६औं मिनेटमा मच्छिन्द्रका खेलाडी विमलले गोल गरे । उनले रेजिन सुब्बाले उपलब्ध गराएको बलमा हेडमार्फत गोल गरेका थिए ।
त्यस्तै खेलको ६२औं मिनेटमा विमलले व्यक्तिगत दोस्रो गोल गरे । खेलको ८४औं मिनेटमा रेजिनले गोल गर्दै मछिन्द्रको अग्रता तेब्बर बनाए । उनले विमलको पासमा गोल गरेका थिए ।
खेलको दोस्रो हाफको अत्तिरिक्त समयमा अभिषेकले गोल गर्दै मछिन्द्रलाई ४-० गोलको जित दिलाए । जितसँगै शीर्ष स्थानमा रहेको मछिन्द्रको नौ खेलबाट २३ अङ्क पुगेको छ । मछिन्द्रले दोस्रो स्थानको मनाङलाई चार अङ्कले पछि पारेको छ । मनाङको १९ अङ्क छ । ब्रिगेड ब्वाइज अङ्क तालिकाको १२औं स्थानमा छ ।
