काठमाडौं। राष्ट्रिय प्रजातन्त्र पार्टी (राप्रपा) नेपालका पदाधिकारीहरूले पार्टीका राष्ट्रिय अध्यक्ष प्रदीप विक्रम राणाले राप्रपा नेपाल कमल थापाको नभएको भन्दै उच्च अदालत पाटनमा अन्तरिम आदेश माग गर्दै निवेदन दिएको जानकारी गराएका छन् । 

आज रिपोर्टर्स क्लब नेपाल पत्रकार सम्मेलनको आयोजना गर्दै अध्यक्ष राणाले पार्टीका ९५ प्रतिशत केन्द्रीय पदाधिकारीलाई झुकाएर राप्रपा नेपालका लाक्पा तामाङले कमल थापालाई पार्टी बेचेको आरोप लगाए । साथै, उनले यसबारे छानबिन गर्न निर्वाचन आयोगमा समेत जानकारी गराएको स्पष्ट पारे ।  

राप्रपा नेपाल कमल थापाले बनाएको पार्टी नभएको भन्दै थापाले ‘आफ्नै घरमा फर्किएँ’ भन्न नमिल्ने उनको तर्क थियो । यस्तै, राजसंस्था र हिन्दु राष्ट्र सखाप पार्नको लागि थापाले राप्रपा नेपाल कब्जा गर्न लागेको पनि राणाको आरोप छ । 

‘यस कदममा ९५ प्रतिशत केन्द्रीय पदाधिकारीको असहमति रहेको छ । निर्वाचन आयोगले कसरी यस्तो निर्णय गर्‍यो ? यसको जवाफ निर्वाचन आयोग र लाक्पा तामाङले पनि दिनुपर्छ । न्यायालयले पनि हामीलाई न्याय दिनुपर्छ,’-उनले भने ।

यस्तै, कमल थापा पटक-पटक बिक्री भएको मान्छे भएको आरोप लगाउँदै उनले भने, ‘कहिले म गणतन्त्रवादी भइसकेँ भन्ने ? कहिले ज्ञानेन्द्रलाई मान्दैन भन्ने ? अनि अहिले अर्काको घरलाई मेरो घर भन्ने ?, उहाँले एकपछि अर्को गरेर असंवैधानिक र गलत कदम चाल्नुभएको छ ।’ 

साथै, उनले अहिले देशको अवस्था विकराल भएको भन्दै अहिले देश बुबाविहीन भएको पनि बताए । फागुन ७ गते राष्ट्रिय सभामा घोषणा सभा गर्ने भनेका थापालाई मुसा प्रवृत्ति छोड्न आग्रह गर्दै राणाले  बरु हिम्मत भए नयाँ पार्टी बनाउन सुझाव दिए । 

कार्यक्रम सञ्चालक तथा पार्टीका उपाध्यक्ष तेजराज भुजेलले राप्रपा नेपाललाई माया गर्नेहरूको मन दुखेको भन्दै राजसंस्था बोकेर हिँडेको मान्छेलाई रातारात गणतन्त्रवादी बनाइकोमा दुःख व्यक्त गरे । 

साथै, उनले लाक्पा तामाङको कदम आफूहरूलाई कुनै पनि हालतमा मान्य नहुने चेतावनी दिए । उनले भने,‘६०-४० को समीकरण बनाएर कमल थापासहितको ठुलो टिम हाम्रो पार्टीमा प्रवेश हुँदै छ तर, हाम्रो पार्टीको सिद्धान्त कतै जाने छैन भनेर हामीलाई झुटो कुरा बोलियो ।’ 

युवाहरूले अगाडि बढाई रहेको पार्टीलाई अबका दिनमा पनि युवाहरूले नै अगाडी बढाउनुपर्ने उनले माग गरे । कमल थापा अध्यक्ष भएको कुरा अवैधानिक रहेको भन्दै अध्यक्ष तामाङले पार्टीका पदाधिकारीहरूलाई अवमूल्यन गरेको पनि उनको आरोप थियो ।  यस्तै, उनले पार्टी र नेतृत्वप्रतिको आफूहरूको भरोसालाई कतिमा बेच्नुभयो ? भन्दै तामाङमाथि प्रश्न उठाएका थिए । 

पार्टीका केन्द्रीय प्रवक्ता राजेश्वरदास श्रेष्ठले वस्त्र जस्तोसुकै भए पनि चरित्र कस्तो छ भन्ने कुरा महत्त्वपूर्ण रहेको भन्दै कमल थापालाई अध्यक्ष स्वीकार गर्न सक्ने अवस्था नरहेको स्पष्ट पारे । ‘हामीले गर्वका साथ राजसंस्था र हिन्दु राष्ट्र भनेर हिँडिरहेका थियौँ र आज पनि यही एजेन्डामा अडिग छौं । तर, एकाएक हामीलाई गणतन्त्रवादी बनाइयो’-उनले भने,‘यो कुरा हामीलाई कदापि मान्य छैन ।’ 

सिंगो पार्टी र पदाधिकारीलाई कुनै जानकारी नदिएर गोप्य रूपमा पार्टीको साँचो अरू कसैलाई बुझाइएको भन्दै उनले दुःख व्यक्त गरे । साथै, अहिलेको अवस्थामा नेताहरूलाई कसैले सम्मान नगर्ने अवस्था आएको भन्दै उनले राजाप्रतिको जनताको सम्मानलाई स्मरण गराए ।  

केन्द्रीय उपाध्यक्ष राम गोपालीले परिवर्तनका संवाहक युवाहरूले चलाइरहेको पार्टीलाई रातारात गणतन्त्रवादी बनाइएको भन्दै आफूहरू कमल थापाको बुट समातेर लाक्पा तामाङसँग सती जान नसक्ने बताए । युवाहरूको सपनामाथि कुठाराघात गर्नु थियो भने किन हाम्रो सपना मार्नुभयो ? भन्दै प्रश्न उनले पनि तामाङमाथि प्रश्न गरे । 

यस्तै, उनले ६०-४० को झूँटो आश्वासन दिएर उपस्थित नभएकाहरूको हस्ताक्षर किर्ते गरेर निर्वाचन आयोगमा गएर कमल थापालाई पार्टी सुम्पिएको आरोप लगाए । ‘कसैले विचार बेचेर झोला भर्‍यो होला । तर, राप्रपा नेपाल कहीँ पनि समाहित भएको छैन’-उनले भने । 

राप्रपा नेपाल धरानका नेतृत्वकर्ता दोर्जे शेर्पाले लाक्पा तामाङले आफूलाई मिठो सपना देखाएर धोका दिएको भन्दै आफुले राजसंस्था र हिन्दु राष्ट्रलाई कहिल्यै पनि नत्याग्ने बताए । 

त्यस्तै, महामन्त्री राजु नापितले सनातन हिन्दु धर्म र राजसंस्थाको एजेन्डा बोकेको राप्रपा नेपाललाई कति पैसामा बच्नुभयो ? भन्दै तामाङमाथि प्रश्न गरेका थिए । 
नागरिक समाजको तर्फबाट हेमविक्रम शिलवालले लाक्पा तामाङले छापामार शैलीमा राप्रपा नेपालका पदाधिकारीलाई थाहा नदिएर गरेको अन्यायप्रति दुःख व्यक्त गर्दै न्यायालयले न्याय दिन्छ भन्नेमा आफू विश्वस्त रहेको बताए । साथै, उनले गाई रातारात कसरी गोरु भयो ? भन्दै प्रश्न उठाएका थिए ।