काठमाडौं । आईसीसी क्रिकेट विश्वकप लिग २ अन्तर्गतको त्रिकोणात्मक एक दिवसीय श्रृंखलाको अन्तिम खेलमा नेपालले अहिले पपुवा न्युगिनी (पीएनजी) विरुद्ध खेलिरहेको छ । यूएईको दुबई क्रिकेट रंगशालामा नेपालले एक सय ७४ रनको चुनौती पछ्याउँदैछ ।
यसअघि टस जितेर पहिले फिल्डिङ गरेको नेपालले पीएनजीलाई १७३ रनमा रोक्न सफल भयो । पीएनजीले ८ विकेटको क्षतिमा १७३ रन बनायो । कप्तान असाद भालाले सर्वाधिक ४५ रन बनाए ।
नेपालका लागि कप्तान सन्दीप लामिछाने र सोमपाल कामीले २–२ तथा करण केसी, आरिफ शेख, दिपेन्द्र सिंह ऐरी र पवन सर्राफले १–१ विकेट लिए ।
नेपालका लागि भीम सार्कीले डेब्यु गरेका छन् । पूर्व कप्तान ज्ञानेन्द्र मल्ल बाहिरिएपछि उनको स्थान भीमले लिएका हुन् ।
नेपालले यसअघि पीएनजीविरुद्ध तीन एकदिवसीय खेल खेलेको छ । सबै खेलमा नेपालले जित निकालेको छ । तर पछिल्लो समय नेपालले कमजोर ब्याटिङ प्रदर्शन गर्दै आएकोमा नेपाललाई पीएनजीविरुद्ध खेल्न सहज हुने छैन ।
त्यतिमात्र हैन श्रृंखलाको अन्तिम खेल खेलिरहँदा पछिल्लो खेलमा पीएनजीले यूएईलाई हराएकाले पनि नेपाल सचेत रहेर खेलिरहेको छ । नेपालले भने यूएईविरुद्ध दुवै खेल हारेको छ ।
यो श्रृंखलाको पहिलो खेलमा नेपालले पीएनजीमाथि २ विकेटको कठिन जित निकालेको थियो ।
नेपालले अहिलेसम्म एक खेल जित्दा दुईमा हार बेहोरेको छ । पीएनजीले दुई खेलमा हार तथा एक खेलमा जित निकालेको छ । यूएईले तीन खेल जितेर श्रृंखलामाथि कब्जा जमाइसकेको छ ।
यस अघिका खेलमा पीएनजीलाई २ विकेटले हराउँदा नेपाल यूएईसँग ४८ र ९९ रनले पराजित भएको थियो ।
लिग २ को सबैभन्दा कमजोर टिम पीएनजीले यूएईलाई पराजित गरेसँगै उसको मनोबल उच्च भएको छ ।
लिग टुमा नेपाल ११ खेलमा ५ जित निकाल्दै १० अंक बनाएर तालिकाको छैटौं स्थानमा छ ।
