छात्रालाई बलात्कार गरी फरार रहेका प्रिन्सिपल पाँच वर्षपछि पक्राउ
हाम्रा कुरा
प्रकाशित २०७९ जेठ १२ बिहिबार
451
Shares
काठमाडौं । प्रहरीले १५ वर्षीया छात्रालाई बलात्कार गरी फरार रहेका प्रिन्सिपललाई घटना भएको पाँच वर्षपछि पक्राउ गरेको छ । पक्राउ पर्नेमा सुनसरी इटहरी उपमहानगरपालिका–५ स्थित ब्लुमिङ लोटस् इङ्लिश स्कूलका प्रिन्सिपल ३६ वर्षीय राज खड्का भन्ने राजकुमार खड्का रहेका छन् ।
सिन्धुली कमलामाई नगरपालिका–७ स्थायी ठेगाना भएका उनलाई प्रहरीले बिहीबार काठमाडौकों त्रिपुरेश्वरबाट पक्राउ गरेको हो । खड्काले आफ्नै स्कूलमा पढ्ने बिरामी भएकी १५ वर्षीया छात्रालाई घुमाउने र औषधि उपचारसमेत गरी दिने भनी २०७४ साउन २६ गते सुनसरीको धरान उपमहानगरपालिका–१० स्थित गेष्ट हाउसमा पुर्याइ बलात्कार गरेको प्रहरीले जनाएको छ ।
उनले ती छात्रालाई स्कूलबाट रेष्टिकेट गरिदिने भनी धम्क्याई बलात्कार गरेको प्रहरीको भनाइ रहेको छ । बलात्कृत भएपछि उक्त स्कूल छाडी अर्कै स्कूलमा पढिरहेकी ती छात्रालाई खड्काले विवाह गर्छु भनी फकाउने र समाजमा वेइज्जत गरिदिने धम्की दिँदै पटक–पटक मानसिक यातना दिने गरेका थिए ।
बलात्कार गरेको भन्ने जाहेरी दरखास्त २०७५ भदौ २ गते जिल्ला प्रहरी कार्यालय सुनसरीमा परेपछि खड्का फरार रहेका थिए । काठमाडौं टोखा नगरपालिकास्थित बानियाँटरमा डेरामा लुकिछिपी बसेका खड्कालाई नेपाल प्रहरी प्रधान कार्यालय केन्द्रीय अनुसन्धान ब्यूरो महाराजगंजबाट खटिएको प्रहरीले काठमाडौं त्रिपुरेश्वरबाट पक्राउ गरी जिल्ला प्रहरी कार्यालय सुनसरीमा पठाएको छ ।
उनलाई फैसला कार्यान्वयनका लागि सुनसरी जिल्ला अदालतमा उपस्थित गराइने छ ।
