नेकपा एसका मन्त्रीहरु फिर्ता बोलाइँदै, नयाँ मन्त्रीको नाम प्रधानमन्त्री देउवाको हातमा
हाम्रा कुरा
प्रकाशित २०७९ जेठ २२ आइतबार
1.3k
Shares
काठमाडौं । नेकपा एकीकृत समाजवादीले आफ्ना भएका चार मन्त्रीलाई फिर्ता बोलाएर नयाँ मन्त्रीको नाम पठाएको छ । एकीकृत समाजवादीको शनिबारदेखि बसेको सचिवालय बैठकमा मन्त्री भएकालाई फिर्ता बोलाउने विषयमा छलफल भएपछि उनीहरुलाई फिर्ता बोलाएर सबै नयाँ टिम पठाइएको हो ।
पुरानालाई फिर्ता बोलाएर नयाँलाई मौका दिइने भएसँगै त्यसको जिम्मा अध्यक्ष माधवकुमार नेपाललाई दिइएको थियो । नेपालले सबै नाम प्रधानमन्त्री शेरबहादुर देउवालाई बुझाएका हुन् ।
एकीकृत समाजवादीबाट मन्त्रिपरिषदमा एक राज्यमन्त्रीसहित पाँच जना मन्त्री छन् । नेकपा एसबाट सरकारमा प्रतिनिधित्व गर्ने नयाँ अनुहारमा जीवनराम श्रेष्ठ, शेरबहादुर कुँवर, मेटमणि चौधरी र हीराचन्द्र केसी रहेका छन् । स्वास्थ्य राज्यमन्त्री भवानी खापुङलाई भने सोही मन्त्रालयमा स्वास्थ्य मन्त्री दिन लागिएको स्रोतले बताएको छ ।
अन्य मन्त्रीमा पर्यटनमा जीवनराम, शहरी विकासमा मेटमणि र श्रममा शेरबहादुर बन्नेछन् । हीराचन्द्रलाई स्वास्थ्य राज्यमन्त्रीको जिम्मेवारी दिन लागिएको छ ।
अहिले नेकपा एसबाट शहरी विकासमा रामकुमारी झाँक्री, पर्यटनमा प्रेम घले, स्वास्थ्यमा विरोध खतिवडा र श्रममन्त्रीमा किसान श्रेष्ठ रहेका छन् ।
गत चैतमा भने पार्टी अध्यक्ष नेपालले मन्त्रीहरु फिर्ता नआउने बताएका थिए । तर अहिले आएर अपर्झट चार मन्त्री फिर्ता बोलाउन लागिएको हो ।
