विश्व च्याम्पियन फ्रान्स क्रोएसियासँग पराजित, लुकाको निर्णायक गोल

हाम्रा कुरा

प्रकाशित २०७९ जेठ ३१ मंगलबार

काठमाडौं । यूईएफए नेसन्स लिग फुटबल अन्तर्गत सोमबार राति भएको खेलमा विश्वविजेता फ्रान्स क्रोएसियासँग १–० अन्तरले पराजित भएको छ ।

पेरिसमा भएको खेलमा घरेलु टोली फ्रान्स पाएका अवसर गुमाउँदा शीर्षस्थानमा उक्लने अवसर गुमायो । भ्रमणकारी टोली क्रोएसियाको जितमा लुका मोड्रिकले पाँचौ मिनेटमा गरेका पेनाल्टी गोल नै निर्णायक भयो ।

यससँगै प्रतियोगितामा फ्रान्सले आफ्नो खराव प्रदर्शन जारी राखेको छ । उसले ४ खेल खेल्दा जम्मा दुई अंक जोडेको छ र पुछारमा छ । क्रोएसिया भने ४ खेलबाट सात अंक जोड्दै दोस्रो स्थानमा छ ।

फ्रान्स र क्रोएसिया रहेको लिग ए समूह १ को अर्को खेलमा डेनमार्कले अष्ट्रियालाई २–० ले हरायो । डेनमार्क ४ खेलबाट ९ अंकसहित शीर्ष स्थानमा छ भने अष्ट्रिया ४ अंकसहित तेस्रो स्थानमा छ ।

लिग बी समूह २ को खेलमा इजरेल र आइसल्याण्डले २–२ गोलको बराबरी खेलेका छन् ।