तस्बिर– महामानव वीपी र उनकी पत्नी सुशीला, अर्काइभ ।
काडामाडौं । जननायक वीपी कोइरालालाई राजनीतिकरुपमा सफल बनाउन उनकी धर्मपत्नी सुशीलाको महत्वपूर्ण भूमिका रहेको जानकारहरूले बताएका छन् ।
सुशीला कोइराला स्मृति प्रतिष्ठानले आयोजना गरेकोे १५ औँ स्मृति दिवसका वक्ताहरूले नेता कोइरालाका सबै राजनीतिक चरणमा सुशीलाले साथ दिएकाले नै वीपी महामानव बन्न सफल हुनुभएको बताए ।
सो अवसरमा अधिवक्ता अशोक उप्रेती र पुण्यप्रसाद अर्याल तथा पत्रकार कविर राणा र श्याम रिमालले श्रीमती कोइरालाको योगदानलाई चीरस्थायी बनाउन संस्थागत ढङ्गले काम गर्नुपर्नेमा जोड दिँदै उनका स्मृतिमा नाट्य प्रतिष्ठान स्थापना गर्नुपर्ने सुझाव दिए ।
यस्तै श्रीमती कोइरालाकी भाइबुहारी कमला शर्मा र अधिवक्ता शान्ता पन्तले तौलिहवा माइती भएका बहुगुणी सुशीलाले घर व्यवहारसमेत सम्हालेर वीपीका हरेक कदममा साथ दिएको बताए । श्रीमती कोइरालाको योगदानबारे आगामी दिनमा विदेशमा समेत प्रचारप्रसार गरिने जनाइएको छ ।
