शिखरलाई पूर्णखोप सुनिश्चितता तथा दिगोपना नगर घोषणा गरियो, आयु पनि बढ्दो

प्रकाश बम,

प्रकाशित २०७९ असार १६ बिहिबार

डोटी । डोटीको शिखर नगरपालिका पूर्णखोप सुनिश्चितता तथा दिगोपना नगर घोषणा भएको छ । नगरपालिकाले २०७८ चैत मसान्तसम्म १६ देखि २३ महिनासम्मका बालबालिकाहरुलाई १५ महिनाको उमेर भित्र पाउनुपर्ने सबै खोप लगाइ पूर्णखोप पाएको सुनिश्चित गरिएको हुँदा पूर्णखोपयुक्त नगरपालिका घोषणा गरिएकाे शिखर नगरपालिकाका स्वास्थ्य इकाइ प्रमुख हरिश शाहले जानकारी दिए ।

जिल्लाका सबै स्थानीय तहहरुमा पूर्णखोप सुनिश्चितता तथा दिगोपना घोषणा अभियान संचालन भइरहेको जिल्ला पूर्णखोप समन्वय समितिका सदस्य सचिव एवं स्वास्थ्य कार्यालय डोटीका प्रमुख डिल्लीरमण जोशीले बताए । ‘बाल मृत्युदर घटाउने उद्देश्यका साथ १५ महिना भित्रका बच्चाहरुलाई १४ वटा रोगका बिरुद्धमा ९ वटा खोपहरु लाउने गरिन्छ’ जोशीले जानकारी दिए ।

मानव स्वास्थ्यलाई ध्यानमा राखेर संचालन भएको खोप अभियानको उच्च मूल्याङ्कन गर्दै जिल्ला पूर्णखोप समन्वय समितिका संयोजक एवं जिल्ला समन्वय समिति डोटीका प्रमुख लक्ष्मणबहादुर सिंहले खोपका कारण नेपालीहरुको आयुदरसमेत बढिरहेको बताए ।

कार्यक्रममा बोल्दै नगरपालिका पूर्णखोप समन्वय समिति संयोजक एवं शिखर नगरपालिकाका प्रमुख दीर्घबहादुर बलायरले सबैको प्रयासबाट नगरपालिकालाई पूर्णखोप सुनिश्चितता तथा दिगोपना नगर घोषणा भएको बताए ।

यसअघि जिल्लाको बोगटान फुड्सिल गाउँपालिका पूणखोप सुनिश्चितता तथा दिगोपना गाउँपालिका घोषणा भइसकेको छ । बैशाखमा हुनुपर्ने घोषणा अभियान स्थानीय निर्वाचनका कारण अहिले भइरहेको स्वास्थ्य कार्यालयले जनाएको छ ।