चितवनमा सवारी दुर्घटना : एक जनाको मृत्यु, एक जना घाइते

हाम्रा कुरा

प्रकाशित २०७९ असार २७ सोमबार

चितवन । भरतपुर महानगरपालिका वडा नं. १ पोखरा बसपार्क नजिकै ट्रकले स्कुटरलाई ठक्कर दिँदा एक जनाको मृत्यु भएको छ । सोमबार बिहान १ः३० बजे भएको सो दुर्घटनामा एकजना घाइते भएका छन् । मृत्यु हुनेमा इच्छाकामना गाउँपालिका वडा नं. ३ का २१ वर्षीय सन्दीप गुरुङ रहेका छन् ।

जिल्ला प्रहरी कार्यालयका अनुसार आज बिहान १ः३० बजेको समयमा पुल्चोकबाट मुग्लिनतर्फ जाँदै गरेको ना५ख ८४९७ नंको ट्रकले भित्री सडकबाट पोखरा बसपार्क जाने मुख्य सडक पार गर्न लागेको ना२६प ४८५१ नंको स्कुटरलाई ठक्कर दिएको हो ।

ट्रकको ठक्करबाट स्कुटर चालक गैँडाकोट नगरपालिका वडा नं. ४ का २१ वर्षीय मनिष लामा गम्भीर घाइते भएका छन् । उनको चितवन मेडिकल कलेज भरतपुरमा उपचार भइरहेको छ । पछाडि सवार गुरुङको उपचारका क्रममा मृत्यु भएको हो । चालकलाई प्रहरीले नियन्त्रणमा लिएको छ ।