चिया बगानमा काम गर्ने तीन किशोरीको शव एउटै रुखमा झुन्डिएको अवस्थामा फेला, सिङ्गो गाउँ शोकमा
युवराज रेग्मी,
प्रकाशित २०७९ साउन ८ आइतबार
1k
Shares
झापा । झापाको कचनकवल गाउँपालिकामा तीन जना किशोरीहरुले एउटै रुखमा झुन्डिएर सामूहिक आत्महत्या गरेका छन् । कचनकवल गाउँपालिका वडा न ५ स्थित पाठामारीको बेल्लेगाउँस्थित सुनकोसी चिया बगानको बयरको रुखमा झुन्डिएर स्थानीय तीन किशोरीले सामूहिक आत्महत्या गरेको प्रहरी कार्यालय झापाका डीएसपी वसन्त पाठकले जानकारी दिएका छ्न् ।
सामूहिक आत्महत्या गर्नेहरूमा कचनकवल गाउँपालिका वडा नं ५ निवासी पंचम गणेशकी १६ वर्षीया छोरी करिना, पुवालु गणेशकी १७ वर्षीया छोरी अञ्जली र बिरबल गणेशकी १६ वर्षीया छोरी कल्पना हुन् ।
स्थानीयका अनुसार उनीहरू तीनै जना शनिवार दिउँसोदेखि घरबाट बेपत्ता भएका थिए । उनीहरू आइतबार बिहान साढे ७ बजे सामूहिक झुन्डिएको अवस्थामा स्थानीयले फेला पारेको प्रहरीले जनाएको छ ।
स्थानीयका अनुसार तिनै जना किशोरीहरु चिया बगानमा काम गर्दै आएका थिए । उनीहरुले सामूहिक आत्महत्या गर्नुको कारण हालसम्म नखुलेको प्रहरिले जनाइएको छ ।
साथै अनुसन्धानका लागि घटनास्थलमा प्रहरी खटाइएको जिल्ला प्रहरी प्रवक्ता डीएसपी पाठकले बताए ।
एकै गाउँका तीन जना किशोरीले सामूहिक आत्महत्या गरेको घटनाले गाउँ नै शोकमा परेको छ ।
