कोहलपुर दम्पती मृत्युकाे पर्दा खुल्योः कन्ट्र्याक किलर बोलाएर भाइ–बुहारीको हत्या
सौरभ गिरी,
प्रकाशित २०७९ साउन १० मंगलबार
502
Shares
नेपालगञ्ज । बाँकेको कोहलपुर वडा नम्बर १४ पार्वतीपुरमा मंगलबार बिहान मृत भेटिएका दम्पतीको हत्या भएको खुलेको छ । २५ वर्षीय श्रीमान कृष्णकुमार गडरिया र २३ वर्षीया श्रीमती अञ्जली गडरियाको हत्या भएको खुल्न आएको हो ।
कृष्णका दाइ–भाउजुले मान्छे लगाएर दम्पतीको हत्या गरेको खुलेको हो । इलाका प्रहरी कार्यालय कोहलपुरले मंगलबार अपरान्ह पत्रकार सम्मेलन गरेर कृष्णका दाइ विजय र भाउजु रेखाले भारतबाट दुई जना कन्ट्र्याक किलरलाई बोलाएर हत्या गराएको जानकारी दिएको छ ।
उनीहरुको हत्या गर्न भारतबाट ५०–५० हजार रुपैयाँ दिएर दुई जनालाई बोलाइएको थियो । सोमबार राति ११ देखि १२ बजेको बीचमा कृष्ण र अञ्जलीको हत्या भएको प्रहरीले बताएको छ ।
दुई जनाको हत्या हुँदा माथिल्लो तलामा विजय र रेखा रहेको भनिए पनि हत्या हुँदा विजय तल नै रहेको प्रहरीको भनाइ छ । कृष्ण र अञ्जलीको शव भेटिएपछि प्रहरीले अनुसन्धान गर्दै जाँदा शंकास्पद अवस्थामा बसेका सहोदर दाइ विजयलाई नियन्त्रणमा लिइ सोधपुछ गरेको थियो ।
विजयले प्रहरीलाई विगत केही महिना अगाडि अञ्जलीले श्रीमान् र ससुरालाई घरायसी विषयमा उक्साएर आफूलाई कुटपिट गर्न लगाएका कारण सुपारी रकम दिएर बुहारीलाई मार्न लगाएको बयान दिएका छन् ।
अञ्जलीलाई मात्र मार्न भनी सुपारी दिए पनि भाइको पनि हत्या भएको उनले स्वीकारेका छन् ।
