दीपाको भारतमा राम्रो डेब्यु, दुई गोल गरेसँगै प्लेयर अफ दि म्याच
हाम्रा कुरा
प्रकाशित २०७९ साउन २९ आइतबार
907
Shares
काठमाडौं । नेपाल राष्ट्रिय महिला फुटबल टोलीकी मिडफिल्डर दीपा न्यौपानेको दुई गोल प्रेरित डन बस्को फुटबल एकेडेमीले शनिबार भारतको केरेला महिला लिगमा पहिलो जित निकालेको छ ।
पहिलो जित निकाल्ने क्रममा दीपाले महत्त्वपूर्ण दुई गोल गरेपछि डन बस्कोले इमिरेट्स सकर क्लबलाई ५–२ ले हराएको थियो ।
नेपाल पुलिस क्लबकी मिडफिल्डरसमेत रहेकी दीपा पहिलो खेलमा भने उपलब्ध भएकी थिइनन् । दोस्रो खेलमा उपलब्ध भएकी दीपाले पहिलो एघारमै पूरा समय मैदान बिताइन् । खेलमा उत्कृष्ट प्रदर्शन गरेकी दीपा प्लेयर अफ दी म्याच घोषित भइन् ।
दीपाले पहिलो खेल राम्रो भएको र अन्य खेलमा समेत मेहनत गर्ने बताइन् । ‘डेब्यु खेलमै प्लेयर अफ दि म्याच भए । निकै खुशी छु । आगामी खेलमा मेहनत गर्दै सत प्रतिशत नतिजाको लागि खेल्छौं’, दीपाले भनिन् ।
इमिरेट्सले खेलमा अग्रता बनाए पनि जोगाउन सकेन । बस्कोको जितमा दीपा सहित प्रेस्माले दुई गोल गरिन् । यस्तै, पुष्पाले अर्को गोल थपिन् । इमिरेट्सको लागि अनिथा र अल्फोन्सियाले एक एक गोल गरे ।
