कोलम्बो । नेपालले श्रीलंकामा जारी साफ यू–१७ च्याम्पियनशिप फुटबलमा समूह विजेता बन्दै सेमिफाइनलमा प्रवेश गरेको छ । समूहको अन्तिम खेलमा भारतलाई पराजित गर्दै नेपाल समूह विजेता बन्दै सेमिफाइनलमा पुगेको हो ।
कोलम्बोको रेस कोर्स ग्राउण्डमा शुक्रबार भएको खेलमा नेपालले भारतलाई ३–१ गोल अन्तरले पराजित गरेको हो । १–० ले पछि पर्दै दबाबमा खेलेका किशोरहरुले एकाएक चामत्कारिक प्रदर्शन गर्दै शानदार जित दिलाए । नेपाललाई जिताउन सरोज दर्लामी, उनेश बुढाथोकी र सुवास बमले एक एक गोल गरे ।
यसअघि खेलको २५ औं मिनेटमा ड्यानी मेइटीले गोल गर्दै भारतलाई शुरुआती अग्रता दिलाएका थिए ।
तर ४५ औं मिनेटमा सरोजले, ४९ औं मिनेटमा उनेशले र ६८ औं मिनेटमा सुवासले गोल गर्दै नेपाललाई ३–१ को जित दिलाए ।
यस जितसँगै नेपालले २ खेलमा ६ अंक जोडेर समूह विजेता बन्दै सेमिफाइनलमा पुग्यो भने समूह बीबाट भारत भारत २ खेलमा ३ अंक जोडेर उपविजेता बन्दै सेमिफाइनलमा प्रवेश गरेको छ ।
नेपालले पहिलो खेलमा भुटानलाई २–१ ले हराएको थियो । भुटान बाहिरिएको छ ।
