बहराइन । एएफसी यू–२० एसिया कप छनोट फुटबलको समूह बीअन्तर्गत सोमबार राति सम्पन्न खेलमा नेपाल कतारसँग ३–१ ले पराजित भएको छ । बहाराइनमा भएको खेलको ३०औं मिनेटमा मोहम्मद मन्सुर अलीले गोल गर्दै कतारलाई अग्रता दिलाएका थिए ।
यस्तै पहिलो हाफको इन्जुरी समयमा फ्रि–किकमार्फत गोल गर्दै मोहम्मद सुरागले कतारको अग्रता दोब्बर पारेका थिए । दोस्रो हाफमा सम्हालिने प्रयास गरेको नेपालले ६०औं मिनेटमा पुनः गोल खायो ।
बलियो देखिएको एसियाली पावरहाउस कतारका लागि जासिमल मोहम्मदले तेस्रो गोल गरेका थिए ।
त्यसको १७ मिनेटपछि कतारकै डिफेन्डरले दिएको पासमा गोलकिपर अमिर हसनले गल्ती गर्दा नेपालले आत्मघाती गोल उपहार पायो ।
पराजयसँगै नेपालको अर्को वर्ष उज्वेकिस्तानमा हुने प्रतियोगितामा छनोट हुने सम्भावना कमजोर बनेको छ ।
सोमबार नै भएको खेलमा बंगलादेशले भुटानमाथि २–१ को कठिन जित निकालेको थियो ।
पहिलो खेलमा नेपाललाई पराजित गरेको भुटानको यो पहिलो हार थियो । यस्तै, पहिलो खेलमा घरेलु टिमलाई गोलरहित बराबरीमा रोक्न सफल बंगलादेशको भने यो नै पहिलो जित हो ।
