जनकपुरधाम। मधेस प्रदेशका नवनिर्वाचित मधेस प्रदेशसभा सदस्यहरूले शुक्रबार पद तथा गोपनीयताको शपथ लिएका छन् । नेपालको संविधानको धारा १८२ को उपधारा (५), प्रदेश सभा सदस्य निर्वाचन ऐन, २०७४ को दफा ७५ बमोजिम ज्येष्ठ सदस्यको हैसियतले प्रदेश सभा सदस्य गोविन्दबहादुर न्यौपानेले नेकपा माओवादी केन्द्रका समानुपातिक सांसदद्वय मालाकुमारी कर्ण र मो रजी हैदरबाहेक अन्य १०४ जना प्रदेशसभा सदस्यहरूलाई शपथ ग्रहण गराएका हुन् ।
७१ वर्षीय ज्येष्ठ सदस्य न्यौपानेले यसअघि बिहीबार नै प्रदेश प्रमुख हरिशंकर मिश्रसँग पद तथा गोपनीयताको शपथ लिएका थिए । सांसद न्यौपानेले ज्येष्ठ सदस्यको हैसियतले प्रदेश सभाको अध्यक्षता गर्नेछन् । नेकपा एकीकृत समाजवादीका न्यौपाने मंसिर ४ मा सम्पन्न निर्वाचनमा सप्तरीको ४ ‘क’ बाट प्रदेशसभा सदस्यमा निर्वाचित भएका थिए ।
नेपालको संविधानको धारा १७९ बमोजिम प्रदेश सभा सदस्यले प्रदेश सभा वा त्यसको कुनै समितिको बैठकमा पहिलो पटक भाग लिनुअघि प्रदेश कानून बमोजिम शपथ लिनुपर्ने व्यवस्था रहेको हो ।
यसपटक मधेस प्रदेशमा नेकपा एमाले, नेपाली कांग्रेस, जसपा, जनमत पार्टी, लोसपा, नेकपा माओवादी केन्द्र, नेकपा एकीकृत समाजवादी, राप्रपा, नेपाल संघीय समाजवादी पार्टी र नागरिक उन्मुक्ति पार्टीसहित १० वटा दलको प्रतिनिधित्व छ ।
मधेस प्रदेशसभामा एमालेले प्रत्यक्षमा १५ र समानुपातिक ८ गरी २३ सिट पाएर पहिलो दल बनेको छ । त्यस्तै, नेपाली कांग्रेस प्रत्यक्षमा १३ र समानुपातिकमा ९ गरी २२ सिट पाएर दोस्रो, जनता समाजवादी पार्टी प्रत्यक्षमा ९ र समानुपातिकमा ७ गरी १६ सिट पाएर तेस्रो, जनमत पार्टी प्रत्यक्षमा ६ र समानुपातिकमा ७ गरी १३ सिटसहित चौथो दल बनेको छ ।
लोसपाले प्रत्यक्षमा ७ र समानुपातिकमा २ गरी ९ सिट पाएर पाँचौँ, माओवादी केन्द्र प्रत्यक्षमा ४ र समानुपातिकमा ४ गरी ८ सिट पाएर छैटौं तथा एकीकृत समाजवादी प्रत्यक्षमा ४ र समानुपातिकमा ३ गरी ७ सिट पाएर सातौँ दल बनेको छ ।
मधेस प्रदेश सभामा राप्रपा, नेपाल संघीय समाजवादी पार्टी र नागरिक उन्मुक्ति पार्टीले समानुपातिकमा १–१ सिट पाएका छन् । मधेस प्रदेशसभामा यसपटक ६ जना स्वतन्त्र उम्मेदवारहरू निर्वाचित भए पनि सर्लाही–३ (क) बाट स्वतन्त्र निर्वाचित प्रदेश सभा सदस्य जवाहरलाल कुशवाहा बिहीबार नेकपा माओवादी केन्द्रमा प्रवेश गरिसकेका हुन् ।
योसँगै मधेस प्रदेशमा नेकपा माओवादी केन्द्रको सांसदको संख्या ९ पुगेको छ ।
सपथ ग्रहणमा ५६ जनाले नेपाली, १३ जनाले बज्जिका, १२ जनाले मधेसी, ११ जनाले मैथिली, ७ जनाले भोजपुरी, ३ जना थारु, २ जना मगही, २ जनाले हिन्दी र १ जनाले उर्दु भाषामा सपथ ग्रहण गरेका छन् ।
सपथ लिनपर्ने १ सय ६ मध्ये माओवादीका दुई सांसद सपथ ग्रहण गर्न पाएनन् । उनीहरू दुवै जना प्रदेश सभा सदस्यमा निर्वाचित भएको घोषणा गर्ने लगायतको बाँकी निर्णय र काम कारबाही कार्यान्वयन नगरी यथास्थितिमा राख्न सर्वोच्च अदालतबाट निर्णय भएकोले शपथ ग्रहणबाट बञ्चित गरिएको हो ।
