अफ्रिकी देशहरूमा खाद्य सुरक्षाका लागि दश अर्ब अमेरिकी डलर सहयोग

रासस-सिन्ह्वा

प्रकाशित २०७९ माघ १२ बिहिबार

डाकार। अफ्रिकी विकास बैङ्कले अफ्रिकी देशहरूमा खाद्य सुरक्षाको प्रयोजनका लागि आर्थिक सहयोग गर्ने भएको छ । सो सहयोगको रकमबाट अफ्रिकाका देशहरूमा खाद्य सुरक्षाका लागि आवश्यक कार्यक्रम तथा आयोजनाहरू सञ्चालन गरिने बताइएको छ ।

अफ्रिकी विकास बैङ्कका अध्यक्ष अकिनुवी अकेसिनाले बुधवार सो कुराको जानकारी दिनुभएको समाचारमा जनाइएको छ ।अफ्रिकी देशहरूमा कृषिको विकास तथा यस सम्बन्धी आयोजनाहरूको सञ्चालनका साथै यसका माध्यमबाट त्यहाँ खाद्यान्नको सुरक्षा गर्ने विषयमा सो बैङ्कले अहिलेका लागि १० अर्ब अमेरिकी डलर बराबरको सहयोग दिन थालेको उनले जानकारी दिए।

डाकार खाद्य सुरक्षासम्बन्धी दोस्रो सम्मेलनका क्रममा बुधवार अध्यक्ष अदेसिनाले सो घोषणा गरेका हुन् । उनले भनेका थिए सो रकम ती देशहरूलाई उपलब्ध गराउने प्रत्यक्ष सहयोग हो र यसबाट खाद्यान्न खरिद गर्नुका साथै कृषिका आयोजनाहरू सञ्चालन गरेर खाद्यान्न उत्पादनका काममा प्रयोग गर्न सकिनेछ ।

सो सम्मेलनलाई सम्बोधन गर्दै उनले भनेका थिए– अफ्रिकी देशहरू अहिले पनि आफ्ना उत्पादनहरूको निर्यातको सट्टा खाद्यान्नको आयातमा निर्भर हुनु परिरहेको छ र यो ठुलो दुर्भाग्य पनि हो ।

अहिले पनि विश्वको खेतीयोग्य जमिनको ठुलो हिस्सा अफ्रिकी देशहरूमा पर्दछ तर यहाँका नागरिक भोकै सुत्नुपर्ने अवस्था छ भन्दै उनले सबै देशहरूलाई उत्पादनका क्षेत्रमा लाग्न आग्रह पनि गरेका थिए ।

डाकारमा बुधवार सुरु भएको सो सम्मेलन यही शुक्रवारसम्म सञ्चालन हुनेछ । सो सम्मेलनमा अफ्रिकामा खाद्यान्नको सहयोग भन्दा पनि उत्पादनका लागि के कसरी तयारी गर्ने भन्ने बारेमा छलफल हुने भएको छ ।