काठमाडौं । दक्षिण एसियाली फुटबल महासंघ (साफ) महिला यू–२० च्याम्पियनशिप फुटबल प्रतियोगितामा नेपाल उपविजेतामै सीमित भएको छ । बिहीबार राति सम्पन्न फाइनलमा नेपाल आयोजक बंगलादेशसँग पराजित हुँदै उपविजेतामै चित्त बुझाएको हो ।
बंगलादेशले ढाकास्थित वीर श्रेष्ठ शहीद सिपाही मुस्तफा कमल स्टेडियममा भएको फाइनल भिडन्तमा नेपाल ३–० गोलले पराजित हुन पुग्यो । बंगलादेशले ४२ औं मिनेट पहिलो, मध्यान्तरअघिको इन्जुरी समयमा दोस्रो तथा ८७ औँ मिनेटमा तेस्रो गोल गरेको थियो ।
भारतलाई हराएर फाइनलमा पुगेको नेपालसँग उत्साह भएको भए पनि आयोजक बंगलादेशसँग लिग चरणमा खाएको हारको बदला लिन नेपाल असफल भयो ।
बंगलादेशलाई जित दिलाउन शाहिदा अक्टर रिपा, शामसुनाहर जुनियर र उन्नोती खातुनले एक एक गोल गरे ।
राउण्ड रोबिनको आधारमा भएको प्रतियोगिताको शीर्ष दुई टोलीले उपाधिका लागि प्रतिस्पर्धा गरेका हुन् ।
चार राष्ट्र सहभागी प्रतियोगितामा नेपाल दोस्रो स्थानमा रहदै फाइनल खेलेको हो । बंगलादेश भने शीर्ष स्थानमा रहेर फाइनल खेलेको हो ।
लिग चरणमा नेपाल बंगलादेशसँग ३–१ ले पराजित भएको थियो ।
सिनियर टिममा समेत काठमाडौंमा भएको आयोजनामा नेपालले भारतलाई हराएर फाइनल पुगेको भए पनि फाइनलमा बंगलादेशसँग पराजित भएको थियो ।
यसबाट महिला फुटबलमा दोस्रो हुँदै आएको नेपाललाई अब बंगलादेशले थप चुनौती दिएको स्पष्ट भएको छ ।
