केपी ओलीको प्रस्तावपछि अलमलिएका माधव भन्छन्– राष्ट्रपतिमा उम्मेदवारीबारे सोचेको छैन
हाम्रा कुरा
प्रकाशित २०७९ फागुन ९ मंगलबार
1.4k
Shares
तस्बिर – फाइल ।
दाङ । नेकपा एकीकृत समाजवादी अध्यक्ष माधवकुमार नेपालले राष्ट्रपति पदमा आफ्नो उम्मेदवारीबारे आफू र पार्टीले कुनै निर्णय गरिनसकेको बताएका छन् ।
देउखुरीमा मंगलबार आयोजित पत्रकार भेटघाट कार्यक्रममा उनले राष्ट्रपतिको उम्मेदवारबारे पार्टी र आफूले केही नसकेको र निर्णय पनि नगरेको बताएका हुन् ।
एमाले अध्यक्ष केपी शर्मा ओलीले माधव नेपाललाई भेटेर आइतबार साँझ पार्टी एकतासहित राष्ट्रपतिका लागि प्रस्ताव गरेपछि माधव नेपालको यो प्रतिक्रिया आएको हो । यसअघि उनको चाहना राष्ट्रपतिमा रहेको थियो ।
तर केपी ओलीसँग सम्बन्ध बिग्रिएसँगै उनले मुख खोल्न सकेका थिएनन् । माओवादी केन्द्रका अध्यक्ष एवं प्रधानमन्त्री पुष्पकमल दाहाल प्रचण्डसँग कुरा गर्दै आएका भए पनि नेकपा एसबाट झलनाथ खनालले पनि राष्ट्रपतिमा इच्छा देखाएपछि उनी पछि हटेजस्तै भएका थिए ।
तर ओलीले आएर अहिले एक्कासी राष्ट्रपतिमा प्रस्ताव गरेपछि भने माधव नेपाललाई निर्णय गर्न कठिन भएको छ ।
ओलीसँगको गोप्य वार्तालाई बाहिर ल्याउन नचाहेका माधव नेपालले विदेशको सञ्चारमाध्यमप्रति निकै नजिक रहेको जस्तै गरी नेपालको सञ्चार माध्यममा आएका सबै सत्य नहुने भनेर तर्किएका छन् ।
