मछिन्द्र झापा गोल्डकपको सेमिफाइनलमा, चर्च ब्वाइज बाहिरियो
युवराज रेग्मी,
प्रकाशित २०७९ फागुन १० बुधबार
1.4k
Shares
झापा । ए डिभिजन टिम मछिन्द्र क्लब झापा गोल्डकप फुटबलको सेमिफाइनलमा प्रवेश गरेको छ । बुधबार झापाको मेची रंगशालामा भएको क्वार्टरफाइनलमा चर्च ब्वाइज युनाइटेडलाई २–१ ले हराउँदै मछिन्द्र क्लब अन्तिम चारमा प्रवेश गरेको हो ।
मछिन्द्र क्लबलाई जित दिलाउन कप्तान सुजल श्रेष्ठ र विमल घर्तीमगरले १–१ गोल गरेका थिए । खेलमा शुरुआती अग्रता चर्च ब्वाइजले लिएको थियो ।
खेलको ५४ औँ मिनेटमा चर्च ब्वाइजका कप्तान अनन्त तामाङले गोल गरेका थिए । तर खेलको अन्तिम १० मिनेटमा दुई गोल गर्दै मछिन्द्र सेमिफाइनलमा पुग्यो ।
खेलको ८१ औँ मिनेटमा सुजल र ८६ औँ मिनेटमा विमलले गोल गरेका थिए ।
मछिन्द्रले फाइनल प्रवेशका लागि आइतबार एपीएफ फुटबल क्लब र काउवार्न बजार प्रगति संघ बंगलादेशबीचको विजेतासँग खेल्ने आयोजक समितिले जनाएको छ ।
बुधबारको खेलको प्लेयर अफ द म्याच मछिन्द्रका कप्तान सुजल श्रेष्ठले हात पारे । उनले नगद २० हजार पुरस्कार पाएका थिए ।
