धनगढी । धनगढीमा सम्पन्न मुलुककै ठूलो धनराशिको धर्मपशुपति स्मृति खुला ब्याडमिन्टन प्रतियोगिताको उपाधि त्रिभुवन आर्मी क्लबका विधान अधिकारी र प्रविन थिङ्गथेनको जोडीले जितेको छ ।
धनगढीस्थित प्रहरी बहुउद्देशीय हलमा सम्पन्न फाइनल खेलमा बुटवलको लाफा समूहका विवेक न्यौपाने र मनोज भौदारको जोडीलाई पराजित गर्दै आर्मीको टिमले रु एक लाख २१ हजार नगद, ट्रफीसहित उपाधि जितेको हो । प्रतियोगितामा लाफा समूहको न्यौपाने र भौदारको टिम उपविजेता बन्दै रु ७१ हजार नगद, ट्रफी र प्रमाणपत्रसहित पुरस्कृत भएको छ ।
खुलातर्फ पोखराका विशाल बस्नेत र प्रविन सिंह एवं काठमाडौँका दीपक राना र राम मल्ल ठकुरीको जोडीले तृतीय स्थान हासिल गरेको छ । उक्त तृतीय स्थान हासिल गर्ने टोली रु ५१ हजार नगदरसहित पुरस्कृत भएको आयोजक प्रहरी पब्लिक ब्याडन्टिन क्लब कोषाध्यक्ष राजेन्द्र बमले जानकारी दिए ।
त्यसैगरी ४५ वर्ष उमेर समूहमाथिको भेट्रान ब्याडमिन्टन प्रतियोगितामा नेपालगञ्जका जयन्त श्रेष्ठ र अनिल लाखेको जोडीले जितेको छ । प्रतियोगिताको फाइनलमा बर्दघाटका बेल छन्त्याल र कर्ण विकको टिमलाई पारजित गर्दै श्रेष्ठको जोडी उपाधि विजेता बनेको हो ।
उक्त संस्करणको विजेता श्रेष्ठको टिमले रु ५१ हजार नगद, ट्रफी र प्रमाणपत्र र उपविजेता छन्त्यालको टिमले रु ३१ हजार नगद प्राप्त गरेको छ भने भेट्रानतर्फ धनगढीका शैलेन्द्र श्रेष्ठ-वीरेन्द्र विष्ट र केशव भट्ट र भोजराज भट्टले तृतीय स्थान हासिल गर्दै रु २१ हजार नगदसहित पु्रस्कृत भएका छन् ।
त्यसैगरी प्रतियोगिताअन्तर्गत सुदूरपश्चिम प्रदेशस्तरीय ‘बी’ लेबल ब्याडमिन्टन प्रतियोगिताको उपाधि धनगढीका गणेश मिश्रा र सिछराज ओझाको जोडीले जित्दै रु ३१ हजार नगदसहित पुरस्कृत भएको छ । सो प्रतियोगितामा ‘बी लेवल’तर्फ कपिल बम र कमाण्डौ कठरियाको जोडी उपविजेता बन्नुका साथै केशव भट्ट-भोजराज भट्ट र नरेन्द्र चन्द र गणेश कठायतले तृतीय स्थान हासिल गरेको आयोजकले जनाएको छ ।
उपविजेता टिमले रु २१ हजार र तृतीय स्थान हासिल गर्ने टिमले रु ११ हजार नगद, ट्रफीसहित पुरस्कृत भएका छन् । तीन दिनसम्म सञ्चालन भएको प्रतियोगितामा कुल एक सय टिमको सहभागिता रहेको प्रहरी पब्लिक ब्याडन्टिन क्लब कोषाध्यक्ष बमले जानकारी दिए ।
धनगढीका प्रतिष्ठत व्यवसायी एवं ब्याडमिन्टनका अग्रज खेलाडी चेतराज जोशीले आफ्ना स्व बुवा धर्म र आमा पशुपतिको स्मृतिमा खुलातर्फको प्रथम पुरस्कार प्रायोजन गरेका थिए ।
