एपिएफलाई हराउँदै मच्छिन्द्र क्लब झापा गोल्डकपको फाइनलमा

युवराज रेग्मी,

प्रकाशित २०७९ फागुन १४ आइतबार

झापा । झापामा जारी मुस्ताङ प्रथम भद्रपुर झापा गोल्डकपको फाइनलमा मच्छिन्द्र क्लब प्रवेश गरेको छ ।

झापाको मेची रङ्गशालामा आज आइतबार भएको दोस्रो सेमिफाइनल खेलमा विभागीय टोली सशस्त्र प्रहरी बलको एपिएफ फुटबल क्लबलाई १–० गोल अन्तरले पराजित गर्दै मच्छिन्द्र क्लबले फाइनल यात्रा सुनिश्चित गर्न सफल भएको हो ।

खेलको १७ औँ मिनेटमा कप्तान सुजल श्रेष्ठले गरेको गोलनै मच्छिन्द्रका लागि निर्णायक गोल बन्यो । खेल समयमा एपिएफले पाएका धेरै मौकाहरू सदुपयोग गर्न नसक्दा सेमिफाइनलबाट बाहिरिन पुग्यो ।

खेलको प्लेयर अफ द म्याच मच्छिन्द्रका सुजल श्रेष्ठ घोषित भए । उनले नगद २० हजार पुरस्कार प्राप्त गर्न सफल भए । मच्छिन्द्रले उपाधिका लागि विभागीय टोली त्रिभुवन आर्मीसँग मंगलबार भिड्नेछ ।

मंगलबार हुने गोल्डकपको फाइनल खेलको विजेता टोलीले नगद रु १३ लाख र उपविजेता टोलीले नगद रु ७ लाख रुपैयाँ प्राप्त गर्ने आयोजकले जनाएको छ ।