- सुन चाँदी दर
- विनिमय दर
- नेपाली पात्रो
- राशिफल
काठमाडौं । राष्ट्रपतिको निर्वाचनमा मत हाल्ने कि नहाल्ने भन्ने बारेमा राष्ट्रिय प्रजातन्त्र पार्टीले कुनै पनि निर्णय गरेको छैन । हिन्दू राष्ट्रको स्थापना र संवैधानिक राजतन्त्रको पक्षमा वकालत गर्दै आएको राप्रपा सरकारमा जानु र अहिलेकै प्रणाली स्वीकार्दै राष्ट्रपतिबाट शपथ लिनुले पनि अन्योलमा रहेको राप्रपाले बाहिष्कार गर्ने कि मत दिने भन्ने निर्णयमा अझै दोधारमा रहेको हो ।
राप्रपाको कार्यालयमै पुगेर एमालेका उम्मेदवार सुवास नेम्वाङले मत मागिसकेको र नेपाली कांग्रेसका उम्मेदवार रामचन्द्र पौडेलले पनि राप्रपाका नेताहरुसँग भेटघाट गरिसकेकाले राप्रपाको साथ कसलाई हुन्छ भन्ने अझै यकिन भएको छैन ।
वर्तमान पुष्पकमल दाहाल प्रचण्ड नेतृत्वको सरकारमा सहभागी राप्रपा समीकरण फेरिना साथ एमालेभन्दा क्रान्तिकारी भएर सरकार छाडेको थियो । यस्तै राजनीतिक जञ्जालको दोधारमा उभिएको राप्रपाका नेताहरूसँग पौडेल र नेम्वाङ दुवैमध्ये कसलाई सहयोग गर्ने भन्ने बारेमा निर्णय गरिसकेका छैनन् ।
राप्रपाका प्रवक्ता मोहन श्रेष्ठका अनुसार दुवै उम्मेदवाहरुले मत मागिसकेको तर कसलाई मत दिने भन्ने बारेमा निर्णय भैसकेको छैन । ‘उम्मेदवारहरु आएर मत माग्नु भएको छ, मत दिन निर्णय भएको छैन, पार्टीभित्र बहिष्कारको कुरा पनि उठेको छ तर बहिष्कार गर्ने पक्षमा राप्रपा नेतृत्व छैन’, प्रवक्ता श्रेष्ठले भने ‘मत दिने निर्णय केही दिनपछि नै हुनेछ ।’
राप्रपाले प्रचण्ड नेतृत्वको सरकारमा उपप्रधानमन्त्रीसहित उर्जा, कानून र शहरी विकास मन्त्रालय लिएको थियो । प्रदेश सरकारमा पनि सहभागी भएको थियो । माओवादीले नेतृत्व गरेका प्रदेश सरकारमा राप्रपाले समर्थन फिर्ता लिइसकेको छ भने एमालेले नेतृत्व गरेको प्रदेश सकारमा भने समर्थन कायमै छ ।
यो हिसाबले हेर्ने हो भने राष्ट्रपतिको निर्वाचनमा एमालेलाई सहयोग गर्ने आँकलन गर्न सकिन्छ । तर राप्रपाले कुनै पनि निर्णय नगरिसकेकाले दुवै उम्मेदवाहरुले मत माग्ने क्रम र शिलशिला जारी छ ।
झापा, रुपन्देही लगायतका स्थानमा एमालेकै सहयोगले राप्रपाले चुनाव जितेको थियो । जसले गर्दा राष्ट्रपतिको निर्वाचनमा पनि एमालेलाई सहयोग गर्ने एमालेको अपेक्षा रहेको छ ।
कांग्रेसका नेता रामचन्द्र पौडेलले पनि मत मागेको र आफ्नो जीवनकालमा कम विवादित रहेका कारण राप्रपाले कांग्रेस उम्मेदवार पौडेललाई पनि मतदान गर्न सक्ने संभावना पनि उत्तिकै रहेको छ ।
नयाँ समीकरण बनेपछि कांग्रेसले राप्रपालाई पनि सरकारमा आउन आग्रह गरिरहेको छ । सरकारबाट बाहिर रहेका राप्रपा र रास्वपा दुवैलाई सरकारमा आउन आग्रह गरिरहेको कांग्रेसले राष्ट्रपतिमा पौडेललाई मतदान गर्न आग्रह गरिरहेको छ ।
तर यी दुवै पार्टी यतिबेला मौन रहेका छन् । मंसिर ४ पछि एमालेले तयार पारेको गठबन्धनमा भने यी दुवै दल उत्साहका साथ सहभागी भएका थिए । तर राष्ट्रपतिको निर्वाचनमा भने सुस्ताएका छन् ।