नवनिर्वाचित राष्ट्रपति पौडेलको शपथमा सभामुख सहभागी नहुने

हाम्रा कुरा

प्रकाशित २०७९ फागुन २६ शुक्रबार

काठमाडौं । नवनिर्वाचित राष्ट्रपति रामचन्द्र पौडेलको शपथ कार्यक्रममा सभामुख देवराज घिमिरे सहभागी नहुने भएका छन् । सभामुख घिमिरे आज बहराइन जाने भएकाले राष्ट्रपति पौडेलको शपथ कार्यक्रममा सहभागी नहुने भएका हुन् ।

सो कुराको जानकारी नवनिर्वाचित राष्ट्रपति पौडेललाई उनकै निवास पुगेर सभामुख घिमिरेले गराएका छन् । साथै नवनिर्वाचित राष्ट्रपति पौडेललाई बधाई ज्ञापन गरेका छन् ।

सभामुख घिमिरेले बहराइनमा शनिबारदेखि हुने अन्तर व्यवस्थापिका सङ्घको एक सय ४६औँ बैठकमा भाग लिन आज त्यसतर्फ जान लागेको नवनिर्वाचित राष्ट्रपति पौडेललाई जानकारी गराए ।

उक्त बैठकमा जाने कार्यक्रम यसअघि नै निर्धारण भइसकेकाले नवनिर्वाचित राष्ट्रपति पौडेलको शपथ कार्यक्रममा सहभागी हुन नपाउने ब्यहोरासमेत सभामुख घिमिरेले जानकारी गराएको उनका प्रेस सल्लाहकार शेखर अधिकारीले जानकारी दिए ।

सो अवसरमा नवनिर्वाचित राष्ट्रपति पौडेलले उक्त बैठकका लागि नेपालका तर्फबाट सफलताको शुभकामना व्यक्त गरेका थिए ।