रुपन्देही । मनाङ मर्स्याङदी क्लब बुटवलमा जारी २२ औं तिलोत्तमा गोल्डकप फुटबल प्रतियोगिताको फाइनलमा प्रवेश गरेको छ । बिहीबार भएको दोस्रो सेमिफाइनल खेलमा मनाङले फ्रेण्ड्स क्लबलाई पेनाल्टी सुटआउटमा ४–३ ले हरायो ।
निर्धारित ९० मिनेटको खेलमा २–२ गोलको बराबरी भएपछि पेनाल्टी सुटआउटमा पुगेको थियो । पेनाल्टी सुटआउटमा फ्रेण्ड्सका रुपेश केसी र डोना थापाले गोल गर्न नसक्दा क्लब बाहिरिएको हो ।
मनाङका जियनाथ सेख, अजित गुरुङ, विसन गुरुङ र आशिष गुरुङले गोल गरेका थिए भने फ्रेण्ड्सका अमित तामाङ, विदेशी खेलाडी टोरिक जिब्रन र उत्तम राईले गोल गरेका थिए ।
निर्धारित समयमा फ्रेण्डस् क्लबका तर्फबाट रफिक अमेनुले खेलको ७ मिनेटमा नै गोल गरेका थिए। यस्तै खेलको २६ मिनेटमा उत्तम राईले गोल गरेका थिए । २–० ले पछि परेको मनाङले पहिलो हाफको इन्जुरी समयमा कप्तान आशिष गुरुङको तथा दोस्रो हाफको दोस्रो मिनेटमै प्रसन्न श्रेष्ठको गोलबाट बराबरी गरेको थियो ।
मनाङका कप्तान आशिष म्यान अफ द म्याच भए ।
गोल्डकपको फाइनल खेल शनिबार हुनेछ । उपाधिका लागि मनाङ र सुदूरपश्चिम ११ भिड्ने छन् ।
