- सुन चाँदी दर
- विनिमय दर
- नेपाली पात्रो
- राशिफल
काठमाडौं । एसीसी प्रिमियर कप क्रिकेटको समूह चरणको अन्तिम खेलमा नेपालले कतारसँग खेल्दैछ । समूह ए मा रहेको नेपालले समूह चरणको अन्तिम खेल कीर्तिपुर मैदानमा बिहान ९ बजे खेल्नेछ ।
यो खेलको जित हारले नेपाललाई खासै फरक पर्दैन । तर नेपालले यही खेलमा कीर्तिमान बनाउन सक्नेछ ।
कीर्तिपुर मैदानमा यही प्रतियोगिताको समूह चरणको खेलमा यूएईले सिंगापुरमाथि कीर्तिमानी रन बनाएको थियो । यूएईले एकै इनिङ्समा ४७१ रन बनाएको थियो । र सिंगापुरले पनि २७० रन बनाएको थियो ।
समग्रमा एकैदिन एकै खेलमा ७४१ रन बनेको थियो । नेपालले घरेलु मैदानमा घरेलु दर्शकलाई भरपूर मनोरञ्जन दिलाउने क्रममा रेकर्ड बनाउने अवसर छ । आजको मौसम पनि राम्रो भएकाले गर्दा नेपाललाई त्यो अवसर छ ।
नेपालका हरेक युवा खेलाडीको ब्याट चल्छ । यदि पहिले ब्याटिङ गर्ने अवसर पाउने हो भने नेपालले उच्च योगफल बनाउन सक्छ । कतार समूह ए को सबैभन्दा कमजोर टिम हो । कतारले एक अंक पनि जोडेको छैन ।
समूह ए बाट सेमिफाइनल पुग्ने दुई टोलीको टुंगो लागिसकेको अवस्थामा यो खेलपछि समूहको विजेता र उपविजेताको टुंगो लाग्नेछ ।
नेपाल ३ खेलमा २ मा जित र १ खेलमा अंक बाँड्दै ५ अंकका साथ एक खेल अगाबै सेमिफाइनलमा पुगेको थियो । ओमान ४ खेलमा ३ मा जित र १ मा हारसहित ६ अंकका साथ सेमिफाइनलमा स्थान बनाएको थियो ।
नेपाललाई समूह विजेता बन्न कतारलाई जित्नुपर्छ । कमजोर कतारसँग अप्रत्याशित हार बेहोरे पनि नेपाललाई यो प्रतियोगिताकालाई फरक पर्दैन ।
नेपाल विजयी हुँदा ७ अंकका साथ समूह विजेताको रुपमा सेमिफाइनलमा स्थान बनाउनेछ । वर्षा वा कुनै कारण खेलमा अंक बाँडेमा पनि नेपाल समूह विजेता बन्नेछ । अंक बाँड्दा नेपाल र ओमान दुवैको समान ६ अंक हुनेछ ।
नेपाल रनरेटमा अघि रहेर समूह विजेता बन्नेछ ।
१० राष्ट्र सहभागी प्रतियोगितामा पाँच पाँच राष्ट्रको दुई समूह रहेको छ । हरेक समहका दुई राष्ट्रले शनिबार हुने सेमिफाइनल खेल्नेछन् ।
आजको अर्को खेलमा हङकङ र कुवेत भिड्दै छन् । यो खेलको विजेता सेमिफाइनलमा पुग्नेछ । ६ अंकका साथ यूएई सेमिफाइनलमा पुगिसकेको छ । ५ अंकको हङकङ र ४ अंकको कुवेतको विजेता सेमिmाइनलमा पुग्ने भएको हो ।
आगामी सोमबार फाइनल हुनेछ । उपाधि विजेता टोली एसिया कपमा खेल्न पाउनेछ । एसिया कपमा यो विजेता टोली भारत र पाकिस्तानको समूहमा रहेर खेल्नेछ । एसिया कप आगामी सेप्टेम्बरमा आयोजना हुनेछ ।
यस्तै शीर्ष तीनमा रहने टोली एसीसी इमर्जिङ कपका लागि छनोट हुनेछन् ।