इमरानलाई रिहा गर्न अदालतको आदेश
काठमाडौं । पाकिस्तानी सर्वोच्च अदालतले अल कादिर ट्रष्ट घोटालामा गिरफ्तार भएका पूर्व प्रधानमन्त्री इमरान खानलाई रिह ागर्न आदेश दिएको छ ।
प्रधानन्यायाधीशको नेतृत्वमा बसेको तीन न्यायाधीशको पूर्ण इजलासले खानको गिरफ्तारी गैरकानूनी भएको बताउँदै छाड्न आदेश दिएको हो ।
अदालतले नेशनल एकाउन्टिबिलिटी ब्यूरो (एनएबी) लाई इमरानलाई रिहा गर्न आदेश दिएको हो ।
यसअघि खानको पार्टी पीटीआईले उनको गिरफ्तारी गैरकानूनी भएको भन्दै सर्वोच्च अदालतमा निवेदन दिएको थियो ।
यता सरकारका प्रवक्ता मरियम औरंगजेबले खानको गिरफ्तारीले न्यायकर्मीहरुलाई तनाव भएको प्रतिक्रिया दिँदै उनको गिरफ्तारीपछि षड्यन्त्र रचेर हिंसा फैलाइएको बताएका छन् ।
खान गत मंगलबार पक्राउ परेका थिए । एनएबीले भने कानूनी तरिकाले नै खानलाई पक्राउ गरिएको बताएको छ ।
मरियमले सर्वोच्च अदालतले खानले अर्बौं रुपैयाँ घोटालामा किन प्रश्न उठाएन भनी प्रश्न गरेका छन् ।
बढ्दै गएको हिंसा नियन्त्रणमा लिने क्रममा सुरक्षाकर्मीले पीटीआईका करिब दुई हजार कार्यकर्तालाई नियन्त्रणमा लिएको छ । अहिलेसम्म १० जनाको ज्यान गइसकेको छ भने करिब तीन सय जना घाइते भएका छन् ।
बुधबार इमरानलाई आठ दिनका लागि एनएबीको नियन्त्रणमा पठाइएको थियो ।
