कठमाडौं । प्रतिनिधि सभा अन्तर्गतका समितिहरुको बैठक शुरु भएको छ । योसँगै संसदीय समितिहरु सबै सक्रिय भएका छन् । सो क्रममा समितिहरुमा परिचयको कार्यक्रम सकिएको छ । समिति सदस्यहरुबीच आपसमा स्वागत भएको छ ।
प्रतिनिधि सभाको निर्वाचन भएको पाँच महिनापछि पहिलो पटक समितिका बैठकहरु बसेका हुन् ।
प्रतिनिधिसभा अन्तर्गतका १० वटै विषयगत समितिको बैठक बसेको हो । मंगलबार सिंहदरबारस्थित आ–आफ्नै सभाहलमा समितिहरुको बैठक बसेको हो ।
पहिलो दिन सबै समितिका बैठकको सभापतित्व समितिका ज्येष्ठ सदस्यले गरे । जसमा कानून, न्याय तथा मानवअधिकार समिति बैठकको सभापतित्व नेपाली कांग्रेसका सभापति शेरबहादुर देउवाले गरे ।
अन्तर्राष्ट्रिय सम्बन्ध र पर्यटन समिति बैठकको सभापतित्व राष्ट्रिय प्रजातन्त्र पार्टी राप्रपाका सांसद पशुपतिशमशेर जबराले गरे ।
राज्य व्यवस्था तथा सुशासन समिति बैठकको सभापतित्व राष्ट्रिय जनमोर्चाका अध्यक्ष चित्रबहादुर केसीले गरे ।
सार्वजनिक लेखा समिति बैठकको सभापतित्व कांग्रेसका सांसद अर्जुननरसिंह केसीले गरे ।
महिला तथा सामाजिक मामिला समितिको सभापतित्व राप्रपाकी सांसद रोशन कार्की ले गरिन् ।
अर्थ समिति बैठकको सभापतित्व कांग्रेस सांसद सन्तोष चालिसेले गरे ।
पूर्वाधार विकास समिति बैठकको सभापतित्व नागरिक उन्मुक्ति पार्टीका सांसद लालवीर चौधरीले गरे ।
उद्योग तथा वाणिज्य र श्रम तथा उपभोक्ता हित समितिको सभापतित्व माओवादी केन्द्रका सांसद रणेन्द्र बराइलीले गरे ।
कृषि, सहकारी तथा प्राकृतिक स्रोत समितिको सभापतित्व जनता समाजवादी पार्टी जसपाका सांसद नवलकिशोर साह सुडीले गरे ।
शिक्षा तथा स्वास्थ्य समितिको सभापतित्व एमालेका सांसद कालुराम राईले गरे ।
सो क्रममा उद्योग तथा वाणिज्य र श्रम तथा उपभोक्ता हित समितिको पहिलो बैठक सम्पन्न भएको छ । सिंहदरबारस्थित समितिको सभाहलमा बसेको बैठकको प्रारम्भमा ज्येष्ठ सदस्य रणेन्द्र बराइलीले सदस्यहरूलाई स्वागत गरेका थिए ।
बैठकमा समितिका सम्पूर्ण सदस्यहरूले आआफ्नो परिचय दिएका थिए । समितिमा २५ सांसद सदस्य छन् । गएको वैशाख १५ गतेको प्रतिनिधिसभा बैठकले समितिमा रहने सदस्यको नाम अनुमोदन गरेको थियो ।
समितिमा नेकपा एमालेका आठ, नेपाली कांग्रेसका सात, नेकपा माओवादी केन्द्र र राष्ट्रिय स्वतन्त्र पार्टीका तीन–तीन, नेकपा एकीकृत समाजवादी, जनता समाजवादी पार्टी जसपा, राष्ट्रिय प्रजातन्त्र पार्टी राप्रपा र जनमत पार्टीका एक–एक सांसद सदस्य छन् ।
बैठकमा समितिका सचिव रामकुमार पौडेलले समितिको सामान्य परिचय र कार्यक्षेत्रका बारेमा सदस्यहरूलाई जानकारी गराएका थिए । उद्योग, वाणिज्य आपूर्ति मन्त्रालय र श्रम, रोजगार तथा सामाजिक सुरक्षा मन्त्रालय तथा उपभोक्ता हितसँग सम्बन्धित विषय सो समितिको कार्यक्षेत्र रहेको छ ।
