काभा महिला भलिबल च्यालेन्ज कप भारतलाई, नेपाल तेस्रो
हाम्रा कुरा
प्रकाशित २०८० जेठ १४ आइतबार
2.1k
Shares
काठमाडौं । एनएससी काभा (सेन्ट्रल एसियन भलिबल एसोसिएसन) महिला भलिबल च्यालेन्ज कपको उपाधि भारतले जितेको छ । आइतबार भएको फाइनलमा काजखस्तानलाई पराजित गर्दै भारतले उपाधि जितेको हो ।
राजधानीको त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा भएको फाइनलमा भारत ३–० को सोझो सेटमा विजयी भएको हो ।
यता आयोजक नेपाल तेस्रो भएको छ । तेस्रो स्थानका लागि भएको खेलमा नेपालले उज्वेकिस्तानलाई ३–१ को सेटमा पराजित गर्दै तेस्रो भएको हो । खेलमा पहिलो सेट गुमाएको नेपालले त्यसपछिको लगातार तीन सेट आफ्नो पक्षमा पार्दै जित निकाल्यो ।
खेलमा पहिलो सेट उज्वेकिस्तानले २५–२० ले आफ्नो पक्षमा पार्यो । त्यसपछि नेपालले खेलको दोस्रो सेट २५–१६ ले जितेर खेलमा फर्किएयो । यसैगरी खेलको तेस्रो सेट २५–१५ र चौथो सेट २५–१३ ले जित्यो ।
हारसँगै उज्वेकिस्तान भने चौथो स्थानमा रह्यो । त्यसैगरी प्रतियोगितामा श्रीलङ्का पाँचौँ, कीर्गिस्तान छैटौँ, माल्दिभ्स सातौँ र बङ्गलादेश आठौँ स्थानमा रह्यो ।
राखेपको विशेष सहयोग तथा नेपाल भलिबल सङ्घको आयोजनामा जारी उक्त प्रतियोगितामा विभिन्न आठ टोलीको सहभागिता रहेको थियो ।
