-
-
-
-
काठमाडौं । राष्ट्रपति रामचन्द्र पौडेल अस्पताल भर्ना भएका छन् । मुटु जाँचका लागि पौडेल मंगलबार बिहान गंगालाल राष्ट्रिय हृदय रोग केन्द्र भर्ना भएका हुन् ।
उनलाई नियमित जाँचका लागि अस्पताल लगिएको हो । उनको एन्जिओग्राम गरिएको छ । छाती दुख्ने समस्या देखिएपछि उपचारका लागि पुगेका मंगलबार बिहान ७ बजे गंगलाल हृदय रोग केन्द्रमा राष्ट्रपति पौडेलको एन्जियोग्राम गरिएको हो ।
उनलाई २४ घण्टा चिकित्सकको निगरानीमा राखिने भएको छ । राष्ट्रपति पौडेलको उपचारमा अस्पतालका निर्देशक डा. चन्द्रमणि अधिकारीसहितको टोली खटिएको छ ।
पछिल्लो समय राष्ट्रपति पौडेलको स्वास्थ्य बिग्रिएको छ । उनी यसअघि भारतमा लामो समय रहेर उपचार गरेका थिए । भारतमा पेटको समस्या भएर गएका भए पनि यसपटक फरक प्रकृतिको रोगको आशंका गर्दै निगरानीमा राखिएको हो ।
