-
-
-
-
काठमाडौं । सांसद अम्बिका बस्नेतले प्रश्न सोधी रहँदा प्रधानमन्त्री पुष्पकमल दाहाल प्रचण्डले त्यसको उत्तर भएको कागज खोजी रहेका थिए ।
बस्नेतको प्रश्न सकिएसँगै सभामुखले प्रधानमन्त्रीलाई जवाफ दिन समय दिए तर प्रधानमन्त्री आफैले पुन सांसदको नाम सोधे ।
प्रधानमन्त्रीले भने - सम्माननीय सभामुख महोदय फेरि मलाई नाम भनिदिनुपर्ने भयो ? यहाँ मेरो थोरै चाहिँ तलमाथि पर्यो ।
सभामुख - अम्बिका बस्नेत, माननीय श्री अम्बिका बस्नेत ।
प्रधानमन्त्रीले फेरि भने - अम्बिका बस्नेत ?
सभामुख - अम्बिका बस्नेत ।
यति भनिरहँदा अम्बिका बस्नेत भने सदनमा बसेर हाँसी रहेकी थिइन् ।
प्रधानमन्त्री कागज पल्टाइ रहे । उनको अनुहार केही मलिन देखिन्थ्यो ।
सभामुखले प्रधानमन्त्रीलाई सहयोग गर्न सङ्घीय सदनका कर्मचारी खटाए ।
प्रधानमन्त्रीले पुन प्रश्नका लागि अम्बिका बस्नेतलाई आग्रह गरे ।
प्रधानमन्त्रीले भने - माननीय सदस्य म फेरि प्रश्न गर्न आग्रह गर्दछु । मेरो तयारीमा केही कमजोरी रहेको देखियो ।
अम्बिका बस्नेतले फेरि हाँस्दै आफ्नो प्रश्न राखिन् । र त्यस्तो उत्तर एक मिनेट पनि नलगाई प्रधानमन्त्रीले दिए ।
