झापाका सबै पालिकामा वीपी स्मृतिमा विविध कार्यक्रम [फोटोफिचरसहित]

हाम्रा कुरा

प्रकाशित २०८० साउन ६ शनिबार

झापा । नेपाली कांग्रेसका संस्थापक वीपी कोइरालाको ४१ औँ स्मृति दिवसको अवसरमा झापा जिल्लाका विभिन्न पालिकामा विविध कार्यक्रम सम्पन्न गरिएको छ ।

कोइरालाको २०३९ साल साउन ६ गते निधन भएको थियो । वीपीले परिकल्पना गरेको आधुनिक नेपालको प्रजातान्त्रिक समाजवाद स्थापनामा आ–आफ्नो स्थानबाट योगदान गर्न सबैलाई प्रेरणा मिलोस् भन्ने हेतुले झापाका विभिन्न पालिकाहरुमा कार्यक्रम गरिएको हो ।

सोही अनुरुप झापाको अर्जुनधारामा नेपाली कांग्रेस ४ नं वडा समितिद्वारा आयोजित वीपीको प्रजातान्त्रिक समाजवाद र आजको राजनैतिक कार्यदिशा विषयक विचार गोष्ठी सम्पन्न भएको छ ।

त्यसैगरी नेपाली कांग्रेस भद्रपुर नगरसमितिले पनि विचार गोष्ठी सम्पन्न गरेको छ । उता नेपाली कांग्रेस दमक नगरसमितिद्वारा वीपी स्मृति दिवसको अवसरमा रक्तदान कार्यक्रम तथा वृक्षरोपण कार्यक्रम सम्पन्न गरेको छ ।

साथै नेपाल विद्यार्थी संघ दमक नगर समितिले दमकको गणतन्त्र चोकमा दीप प्रज्ज्वलनको कार्यक्रम आयोजन गरेको छ ।

त्यसैगरी नेपाली कांग्रेस गौरादह नगर समिति एवं वीपी अध्ययन प्रतिष्ठान गौरादहले विचार गोष्ठी एवं नगरका सम्पूर्ण वडाहरुमा वृक्षरोपण कार्यक्रम सम्पन्न गरेको छ ।

झापाकै कमल गाउँपालिकामा पनि वीपी स्मृति दिवसको अवसरमा वृक्षरोपण कार्यक्रम सम्पन्न गरिएको छ ।

त्यसैगरी नेपाल प्रेस युनियन माइपश्चिम क्षेत्रीय समितिले वीपी स्मृति दिवसको अवसरमा दमक अस्पताल दमकमा उपचारारत बिरामीहरुलाई फलफूल वितरण कार्यक्रम सम्पन्न गरेको छ ।

त्यस्तै मेचीनगर नगरपालिकाको धुलाबारीमा धुलाबारी क्याम्पस परिसरमा नेपाली कांग्रेस मेचीनगर १० नं वडासमितिले पनि वृक्षरोपण कार्यक्रम सम्पन्न गरेको छ ।