काठमाडौं । नेपाल उद्योग वाणिज्य महासंघको विशेष साधारणसभा काठमाडौंमा चल्दैछ । विधान संशोधनको एकमात्र एजेण्डा बोकेर भद्रकालीस्थित आर्मी अफिसर्स क्लबमा आयोजित उक्त सभामा प्रतिनिधिहरूलाई मात्रै निकै कडाईका साथ प्रवेश दिईएको छ भने गैरप्रतिनिधिहरूलाई बाहिरबाट नै प्रवेश निषेध गरिएको छ ।
महासंघले प्रदान गरेको प्रवेश पत्रबोकेका बाहेक अरूलाई प्रवेश नदिईएको उक्त सम्मेलनमा पत्रकारहरूलाई भने मूल गेटबाट नै प्रवेश नदिन निर्देशन प्राप्त भएको त्यहाँ रहेका सुरक्षाकर्मीहरूले जानकारी दिए ।
उता, साधारणसभामा भने विधानको विषयमा छलफल सुरू भएको छ । विधानसमितिले विधान प्रस्तुत गरेपछि उपस्थितहरूले उक्त विधानमाथि टिप्पणी गर्ने काम सुरू हुन लागेको उपस्थित एक प्रतिनिधिले जानकारी दिए ।
लामो समयदेखि विधान संशोधनको लागि प्रयासरत रहेको महासंघले यो पटक महासंघको विधान संशोधन गराउनको लागि विशेष साधारण सभा डाकेको थियो । तर उक्त सभा रोक्न माग गर्दै रिट दायर भएपछि अन्योलमा परेको साधारणसभा बुधबार उच्च अदालत पाठनले सफाई दिएसँगै अन्यौलता हटेर सुचारु भएको थियो ।
