काठमाडौँ । मछिन्द्र फुटबल क्लब एएफसी कप प्रारम्भिक चरणको छनोटमा संघर्षपूर्ण जित निकाल्दै भारतीय क्लब मोहन बगानसँगको भेट पक्का गरेको छ । 

मछिन्द्रले मंगलबार त्रिपुरेश्वरस्थित दशरथ रंगशालामा पारो एफसीमाथि ३–२ को संघर्षपूर्ण जित निकाल्दै दोस्रो चरणमा स्थान बनाएको हो । 

भुटानको शीर्ष डिभिजन च्याम्पियन पारोले गोल गर्दै अग्रता बनाए पनि जित निकाल्न सकेन । अब मछिन्द्रले दोस्रो चरणको खेलमा भारतीय क्लब मोहन बगानसँग अगस्त १६ मा प्रतिस्पर्धा गर्दै छ । 

पहिलो हाफमा पारो ३–१ ले पछि पर्यो । तर खेलको दोस्रो हाफमा सुधारिएको प्रदर्शन गर्दै एक गोल फर्काए पनि पारोले जित आत्मसात गर्न सकेन ।

खेलको सातौँ मिनेटमा पाराले अग्रता लिएको थियो । काजुओ होमाको गोलबाट पाराले अग्रता लिए पनि मछिन्द्र छिट्टै खेलमा फर्कियो । १२ औँ मिनेटमा आयुष घलानको क्रसमा विमल घर्ती मगरको हेडरमार्पmत मछिन्द्र खेलमा फर्कियो । 

१५ औँ मिनेटमा मछिन्द्रले अर्को गोल गर्यो । विमलको पासमा आयुषले गोल गर्दै मछिन्द्र अग्रता दिलाए । २७ औँ मिनेटमा विमलको अर्को लामो प्रयास पहिलो बार हुँदै बाहिरियो । ३९औं मिनेटमा ओमुलाजा करिमको क्रसमा अफिज ओलावालेले हेडर गरे ।

४३ औँ मिनेटमा उत्सव राईले डिबक्स बाहिरबाट शसक्त प्रहार गरे पनि पोस्टको दिसामा राख्न सकेनन् । 

४९ औँ मिनेटमा सनीष श्रेष्ठले डिबक्स भित्रबाट पाएको अवसर सदुपयोग गर्न सकेनन् । उनको प्रहार माथिल्लो बारबाट आकासियो । ५७ औं मिनेटमा एसी दोङ पेनाल्टी बक्स भित्रबाट गरेको प्रहार मछिन्द्रका गोलकिपर विशाल श्रेष्ठले सहजै नियन्त्रणमा लिए । ६०औं मिनेटमा इभान असान्तेको प्रहार पनि विशालले सहजै नियन्त्रणमा राखे । त्यसको सात मिनेटपछि मछिन्द्रका आशिष चौधरीको पेनाल्टी बक्स बाहिरको प्रहार गोलमा परिणत हुन सकेन ।

७१औं मिनेटमा इभान्सले लामो पास नियन्त्रण लिँदै गोल गरेका थिए । त्यो गोलसँगै पाराले खेलमा फर्किने आशा देखायो । ८९औं मिनेटमा डिबक्स भित्रबाट काजुओ होमाको प्रहार मच्छिन्द्रका गोलकिपर विशालले उत्कृष्ट बचाउ गरे । इन्जुरी समयमा विमलले खाली पोस्टमा गोल गर्न चुके । 

आशिषले दिएको पासमा गोलकिपर ग्याल्छेन ग्याङ्पो पनि बिट भएको अवस्थामा उनले गोल गर्न सकेनन् । यद्यपि, मच्छिन्द्रले जित निकाल्दै दोस्रो प्रयासमा एएफसी कप प्रारम्भिक चरण छनोटको दोस्रो चरणमा प्रवेश गरेको छ । 

यसअघि पहिलो सिजनमा भने मछिन्द्र प्रारम्भिक चरणको छनोटको पहिलो चरणमा नै श्रीलंकको ब्लु स्टारसँग २–१ ले स्तब्ध भएको थियो ।