काठमाडौँ । अखिल क्रान्तिकारी कम्युनिस्ट पार्टी नेपालले नेपाल आयल निगमको कार्यालय घेराउ गरेको छ । पेट्रोलियम पदार्थमा भारी मूल्य वृद्धि गरिएको भन्दै क्रान्तिकारीले विरोध प्रदर्शन गरेको हो ।
निगमले गत महिनादेखि स्वचालित प्रणालीअनुसार मूल्य समायोजन गर्न थालेको छ । जसअनुसार भारतबाट नयाँ मूल्य आएलगत्तै निगमले स्वचालित प्रणालीअनुसार मूल्य समायोजन गर्छ ।
जसअनुसार मूल्य बढेर आए नेपालमा पनि बढ्नेछ भने घटेर आए नेपालमा पनि घट्ने छ । सोही अनुसार गत १५ दिनअघि एलपीजी ग्यासमा प्रतिसिलिन्डर एकैपटक १३० रुपैयाँ घटेको थियो ।
यसपालि भारतबाट मूल्य बढेर आएसँगै डिजेल, पेट्रोल, मट्टितेलमा बढेको छ भने ग्यासको मूल्य फेरि पनि घटेर १ हजार ६६० रुपैयाँ पुगेको छ ।
मूल्य बढेसँगै उपत्यकामा पेट्रोल प्रतिलिटर १७७ तथा डिजेल र मट्टितेल समान १६७ रुपैयाँ पुगेको छ । देशभर फरक फरक हुने हुनाले दुईदेखि तीन रुपैयाँ मूल्य फरक पर्न जान्छ ।
सोही अनुसार मूल्य समायोजन हुँदा भने क्रान्तिकारीले विरोध गरेको हो ।
