-
-
-
-
काठमाडौँ । वरिष्ठ कलाकार, नृत्यगुरु, नेपाल फिल्म सोसाइटीका कार्यकारी सदस्य एवं नेपाल चलचित्र कलाकार संघका पूर्व कार्यवाहक अध्यक्ष सानु ताम्रकारको निधन भएको छ ।
पुत्र वियोगमा परेका ताम्रकारको शनिबार निधन भएको हो । उनका छोरा नायक सारुक ताम्रकारको केही समयअघि निधन भएको थियो । सारुकले आत्महत्या गरेका थिए ।
त्यो घटनापछि उनी आईसीयूमा भर्ना भएका थिए । सानुको उपचारका क्रममा शनिबार नर्भिक अस्पतालमा निधन भएको हो ।
नर्भिक अस्पतालमा उपचारका लागि भर्ना भएको २८ औँ दिनमा उनको निधन भएको हो । ७५ वर्षीय ताम्रकार मृगौलामा समस्याबाट पीडित थिए ।
शास्त्रीय नृत्यमा पारंगत ताम्रकारले दर्जनौँ नेपाली फिल्ममा अभिनय गरेका थिए ।
उनको निधनसँगै पुत्र बियोगमा रहेको बेला अस्पताल भर्ना भएका ताम्रकार परिवार थप शोकमा परेको छ ।
उनको आइतबार पशुपति आर्यघाटमा अन्त्येष्टि गरिने जनाइएको छ ।
