काठमाडौँ । नेपाल भ्रमणमा रहेका संयुक्त राष्ट्र सङ्घका महासचिव एन्टोनियो गुटेरेसले प्रधानमन्त्री पुष्पकमल दाहाल ‘प्रचण्ड’सँग भेट गरेका छन् । मुख्यसचिव डा वैकुण्ठ अर्याल र परराष्ट्र सचिव भरतराज पौड्यालले महासचिव गुटेरेसलाई सिंहदरबारस्थित प्रधानमन्त्री तथा मन्त्रिपरिषद्को कार्यालयमा स्वागत गरे ।
चार दिने नेपाल भ्रमणमा रहेका गुटेरेसले औपचारिक छलफलको थालनी सिंहदरबारबाट थालेका हुन् । उनले सो क्रममा शुरुआतमा परराष्ट्रमन्त्री एनपी साउदसँग भेटघाट गरे । साउदले नै उनलाई बिहान १ बजे त्रिभुवन अन्तर्राष्ट्रिय विमानस्थल पुगेर स्वागत गरेका थिए । साउद आजै अमेरिका जाँदैछन् ।
त्यसपछि गुटेरेसले उपप्रधान तथा रक्षामन्त्री पूर्णबहादुर खड्कासँग कुराकानी गरेका गुटेरेसले प्रचण्डसँग छलफल गरेका हुन् । सिंहदरबारमा गृहमन्त्री नारायणकाजी श्रेष्ठसँग पनि भेटवार्ताको कार्यक्रम थियो । तर उनीसँग मंगलबार भेटवार्ता हुने भएको छ ।
गृहमन्त्री श्रेष्ठ हृदयाघात भएर चीनबाट फर्केपछि खासै घुलमिल भइरहेका छैनन् ।
गुटेरेसले पूर्वप्रधानमन्त्री एवं नेपाली कांग्ेसका सभापति शेरबहादुर देउवा, पूर्वप्रधानमन्त्री एवं विपक्षी दलका नेता केपी शर्मा ओलीसँग भेटेपछि अपरान्ह ४ बजे राष्ट्रपति रामचन्द्र पौडेलसँग शिष्टाचार वार्ता गर्दैछन् । त्यसपछि उनी पाटन दरबारस्क्वायर जानेछन् ।
बेलुकी ७ बजेदेखि पौने ९ बजेसम्म प्रधानमन्त्री प्रचण्डले आयोजना गर्ने राजकीय रात्रिभोजमा सहभागी हुनेछन् । रात्रिभोज होटल सोल्टीमा हुनेछ ।
उनले १४ गते संसद बैठकमा सम्बोधन गर्नेछन् । यो सम्बोधनबारे सांसदहरुलाई आज संसदमा जानकारी गराई सभामुख देवराज घिमिरेले १४ गते दिउँसो ३ः४५ सम्म आ–आफ्नो सिटमा बसिसक्न पनि सांसदहरुलाई निर्देशन दिएका छन् ।
