-
-
-
-
यो तेरो यो मेरो गर्दा गर्दै सकिन्छ जिन्दगी
हरपल हरक्षण मर्दामर्दै सकिन्छ जिन्दगी !
हिजो भएन अब त केही हुन्छ होला भनी
आश विश्वासमा पर्दापर्दै सकिन्छ जिन्दगी !
कुन ठाउँ गए सुखका दिन आउँछन् सोची
यताउता बसाइ सर्दासर्दै सकिन्छ जिन्दगी !
कहिले ठूला कहिले साना सुख र दुःखका
आइपर्ने जंघार तर्दातर्दै सकिन्छ जिन्दगी !
अरुलाई प्रकाश दिन जलेको त्यो मैनसरी
पग्लिएर आफू झर्दाझर्दै सकिन्छ जिन्दगी !
चाहना पूरा हुँदा खुशीका नहुँदामा दुःखका
नयनहरु आँशुले भर्दा भर्दै सकिन्छ जिन्दगी !
सबैका चाहना स्वर्गमा पुग्ने मरेर गएपछि
तर मृत्युसँग नै डर्दाडर्दै सकिन्छ जिन्दगी !
