राष्ट्रपति पौडेलले गरे युरोप भ्रमण स्थगित, मंगलबार भूकम्प प्रभावित क्षेत्रमा जाने

हाम्रा कुरा

प्रकाशित २०८० कार्तिक २० सोमबार

काठमाडौं । राष्ट्रपति रामचन्द्र पौडेलले युरोप भ्रमण स्थगित गरेका छन् । जाजरकोट भूकम्पका कारण थुप्रै जनधनको क्षति भएपछि उनले भ्रमण स्थगित गरेका हुन् ।

पौडेल मंगलबार भूकम्प प्रभावित रूकुम पश्चिम र जाजरकोट जाने कार्यक्रम तय भएको राष्ट्रपति पौडेलको प्रेस संयोजक खिला कार्कीले जनाएक छन् ।

सरकारले गत सातामात्र राष्ट्रपति पौडेलको युरोप यात्रा स्वीकृत गरेको थियो । राष्ट्रपति पौडेल बुधबार २२ गते युरोप भ्रमणमा निस्कने कार्यक्रम तय भएको थियो ।

नौ दिनमा तीन देश फ्रान्स, जर्मनी र इटाली भ्रमण गरेर राष्ट्रपति पौडेल मंसीर १ गते स्वदेश फर्कने कार्यक्रम थियो । बिहीबार बसेको मन्त्रिपरिषद् बैठकका निर्णय शुक्रबार सुनाउँदै सरकारका प्रवक्ता रेखा शर्माले सो बारेमा जानकारी गराएकी थिइन् ।

फ्रान्सको पेरिसमा आयोजना हुने पेरिस पिस फोरममा भाग लिन र सो पश्चात संघीय गणतन्त्र जर्मनी र इटालीको भ्रमण गर्ने तय भएको थियो ।