उपरथी पाण्डेलाई राजीनामा दिन दबाब, प्राड विवाकमा छलफल

हाम्रा कुरा

प्रकाशित २०८० कार्तिक २४ शुक्रबार

काठमाडौँ । नेपाली सेनाभित्रको उमेर विवाद पेचिलो बन्दै गएको बेला उपरथी ताराध्वज पाण्डेको विषयमा अख्तियार दुरूपयोग अनुसन्धान आयोगले चासो राखेपछि सेनाभित्र हलचल पैदा भएको छ ।

बिहीबार राति नेपाली सेनाको प्राड विवाकमा उच्च अधिकारीबीच छलफल भएको र पाण्डेको उमेर विवादबारे रक्षामा जवाफ पठाउने विषयमा छलफल भएको उच्च सैनिक स्रोतले जानकारी दिएको छ ।

सैनिक स्रोतका अनुसार रथीका लागि सिफारिस भएका उपरथी पाण्डेमाथि राजीनामाको नैतिक दबाबसमेत परेको बताइएको छ । ‘राति अबेरसम्म प्राड विवाकमा कानूनविदहरुसहित आन्तरिक रुपमा छलफल भएको थियो’, उच्च स्रोतले भन्यो ।

पाण्डेको उमेर विवादलाई लिएर अख्तियार दुरूपयोग अनुसन्धान आयोगले रक्षा मन्त्रालयलसँग पत्रचार गरी चासो राखेको थियो । अख्तियारको चासोपछि बढुवा गर्दा मन्त्री झन् विवादमा पर्न सक्ने भन्दै प्राड विवाकमा छलफल भएको थियो ।

उपरथी पाण्डेको शैक्षिक योग्यताको प्रमाणपत्र र नागरिकतामा जन्ममिति फरक परेको भन्दै बढुवा सिफारिसप्रति प्रश्न उठाइएको हो ।

पाण्डे २०४३ सालमा सेनाको अधिकृत क्याडेटमा भर्ना हुँदा उनको नागरिकता प्रमणपत्रमा जन्म मिति २३ मंसिर २०२३ उल्लेख छ ।

तर उनको शैक्षिक प्रमाणपत्रमा भने जन्म मिति १२ माघ २०२१ उल्लेख भएको विषय बाहिर आएपछि विवाद शुरु भएको हो ।

पाण्डेको एसएलसी बोर्डको प्रमाणपत्र, क्याम्पसको रेकर्ड तथा त्रिभुवन विश्वविद्यालय परीक्षा नियन्त्रण कार्यालयको दर्ता कार्डमा जन्म मिति २०२१ माघ १२ गते उल्लेख भएको तर उनले नागरिकतामा जन्म मिति सच्याएर २०२३ मंसिर १३ गते बनाएको आरोप लगाइएको छ ।