झापा लिग फुटबल शुरू, उद्घाटनमा बिर्तामोड र हल्दिबारीबीच बराबरी

युवराज रेग्मी,

प्रकाशित २०८० मंसिर ७ बिहिबार

झापा । प्रथम झापा लिग फुटबल प्रतियोगिता शुरू भएको छ । झापाको भद्रपुरस्थित मेची रंगशालामा शुरु भएको जिल्लास्तरीय लिग तथा नकआउट फुटबल प्रतियोगिताको उद्घाटन खेलमा बिर्तामोड नगरपालिका र हल्दिबारी गाउँपालिकाले बराबरी नतिजा निकाल्दै अंक बाँडेका छन् ।

भद्रपुर झापा गोल्डकपको आयोजनामा भइरहेको प्रतियोगितामा हल्दिबारीले अग्रता लिए पनि बिर्तामोडलेसमेत गोल फकाउँदा २–२ गोलको बराबरी भएको हो ।

खेलको २८ औँ मिनेटमा हल्दिबारीका हिरण राजवंशीले गोल गर्दै टिमलाई अग्रता दिलाए । ३१ औँ मिनेटमा बिर्तामोडका सुजनविक्रम लिम्बूले गोल फर्काइ बराबरी पार्न सफल भए ।

६२ औँ मिनेटमा बिर्तामोडका रोमन भुजेलले गोल गर्दै टिमलाई अग्रता दिलाउन सफल भए । तर ७६ औँ मिनेटमा हल्दिबारीका कप्तान विकास जवेगूले गोल फर्काएपछि निर्धारित समयसम्म खेल बराबरी हुन पुग्यो ।

खेलको प्लेयर अफ द म्याच हल्दिबारीका हिरण राजवंशीले प्राप्त गर्न सफल भए ।

प्रतियोगितातको उद्घाटन नेपाली कांग्रेसका नेता कृष्णप्रसाद सिटौलाले गरेका थिए ।