काठमाडौँ । सुनको भाउ यो साताका शुरुआती दुई दिनमा यसरी बढ्यो कि नेपालमै सर्वाधिक महँगो भयो । तर जसरी बढ्यो त्यसरी नै मंगलबार र बुधबार सुनको भाउ घटेको छ ।
बिहेको लगनका कारण पनि पछिल्लो समयमा दिनदिनै नयाँ रेकर्ड बनाउँदै आएको सुनको भाउले सोमबार अहिलेसम्मकै सबैभन्दा ठूलो रेकर्ड बनाएको थियो ।
नेपाल सुनचाँदी व्यवसायी महासंघका अनुसार सोमबार सुनको भाउ प्रतितोला १ लाख २१ हजार ६ सय पुगेको थियो । आइतबार प्रतितोला १ लाख २० हजार ८ सयमा सुनको कारोबार भएको थियो ।
तर त्यसपछिका दुई दिन भने सुनको भाउ उसैगरी घटेको छ । मंगलबार २४ सय रुपैयाँले घटेको सुनको भाउ बुधबार ८०० रुपैयाँले घटेको छ ।
बुधबार तोलामा ८०० रुपैयाँले घटेर छापावाल सुन प्रतितोला १ लाख १८ हजार ४०० रुपैयाँ र तेजाबी सुन प्रतितोला १ लाख १७ हजार ८५० रुपैयाँमा कारोबार भइरहेको नेपाल सुनचाँदी व्यवसायी महासंघले जनाएको छ ।
मंगलबार र बुधबार गरेर सुनको भाउ ३२ सय रुपैयाँले घटेको हो ।
यस्तै बुधबार चाँदीको भाउ तोलामा नै २० रुपैयाँले घटेर १ हजार ४८० रुपैयाँमा किनबेच भइरहेको महासंघले जनाएको छ ।
