रौतहट । चन्द्रपुर नगरपालिका वडा नं १ स्थित बागमती नदी किनारमा सयौँ घनमिटर ढुंगा उत्खनन गरेर भण्डार गरिएको छ । चन्द्रपुर नगरपालिकाले बागमती नदीमा ठेक्का हालसम्म नलगाएको अवस्थामा अवैधरूपले उत्खनन गरेर भण्डार गरिएको छ ।
सयौँ घनमिटर ढुंगा सम्बन्धित निकायले जफत गर्नुपर्ने स्थानीय वासिन्दाले माग गरेका छन् । अवैद्य रुपमा नदीबाट उत्खनन गरेर बागमती किनारको दोभान सामुदायिक वन क्षेत्रमा भण्डार गरिएको ढुंगा संकलनकर्ताहरु र व्यवसायीले बिक्री वितरणसमेत गर्दै आएको सरोकारवालाहरु बताउँछन् ।
चन्द्रपुर नगरपालिकाले बागमती नदीमा ठेक्का नलगाएको अवस्थामा ढुङ्गा संकलन गर्ने नियम विपरीतको कार्य गरेको गुनासो छ ।
उनीहरुले ढुंगा बिक्री गर्न जिल्लाको दक्षिणी भेगमा लैजाँदा सर्लाहीको बागमती नगरपालिकाको ढुंगा हो भन्दै लाने गरेका छन् ।
नियम विपरीत संकलन गरेर राखिएको ढुंगा नगरपालिकाले जफत गर्नुपर्ने स्थानीयको माग रहेको छ ।
डिभिजन वन कार्यालय रौतहटका सहायक वन अधिकृत सुरेश महतोले नियम विपरीत बागमती नदी किनारमा उत्खनन गरेर भण्डार गरी राखेको ढुंगाको विषयमा अनुसन्धान अगाडि बढाएको जानकारी दिएका छन् ।
