काठमाडौँ । राष्ट्रिय प्रजातन्त्र पार्टीले राजसंस्था सहितको हिन्दू राष्ट्र पुनः स्थापना र प्रदेश तहको खारेजीको लागि देशभर आन्दोलन गर्ने निर्णय गरेको छ ।

आइतबारबाट बसेको पार्टीको केन्द्रीय कार्यसमितिको बैठकले यस्तो निर्णय गरेको हो । बैठकले पुस, माघमा देशभर सभा र तयारीका कामहरू गर्ने पनि निर्णय गरेको छ । फागुन महिनामा मेची महाकाली एकता यात्रा र उपत्यका केन्द्रित प्रदर्शन गर्ने निर्णय गरेको छ ।

 त्यस्तै आन्दोलनका लागि पार्टी अध्यक्ष राजेन्द्र लिङदेनको अध्यक्षतामा केन्द्रीय आन्दोलन मूल समिति गठन गरेको छ । डा. धवल शमशेर राणाको संयोजकत्वमा आन्दोलन परिचालन समिति, पार्टीका कोषाध्यक्ष नीलकण्ठ काफ्लेको संयोजकत्वमा आर्थिक परिचालन समिति, प्रवक्ता तथा प्रचार विभाग प्रमुख मोहनकुमार श्रेष्ठको प्रचार तथा प्रसार समिति गठन गरेको छ ।

कोषाध्यक्षबाट प्रस्तुत आर्थिक प्रतिवेदन, सचिवालयका प्रतिवेदन लगायत प्रदेश कार्य समितिका प्रतिवेदनहरू परिमार्जनसहित पारित गर्ने निर्णय भएको पनि पार्टी अध्यक्ष लिङदेनले बताए । उनकाअनुसार बैठकले जाजरकोट केन्द्रबिन्दु बनाएर गएको भूकम्प प्रभावित परिवारहरूलाई तत्काल पालबाट अस्थायी आवासमा स्थानान्तरण गर्न सरकारको ध्यानाकर्षण गराउने निर्णय गरेको छ ।

उनले भन्नुभयो, ‘मुलुकको बिग्रँदो अर्थतन्त्र, आम जनतामा बढ्दो निराशा, चरम बेरोजगारी, आर्थिक मन्दीका कारण साना किसान तथा उद्यमीहरूमाथिको बढ्दो ऋण भार, युवा शक्तिको विदेश पलायन, भ्रष्ट्राचार लगायतका जनजीविकाका मुद्दाहरूका साथै राजसंस्था, स्वधर्म समभाव पूर्ण धार्मिक स्वतन्त्रता सहितको वैदिक सनातन धर्म सापेक्ष हिन्दु राष्ट्र पुनः स्थापना र प्रदेश तहको खारेजीको लागि व्यापक जनदबाब सिर्जना गर्न बृहत् आन्दोलन गर्ने निर्णय गरिएको छ । आन्दोलनको तयारीका लागि पुस, माघमा देशैभर व्यापक सभा तथा तयारीका कामहरू गरिनेछ। फागुन महिनामा मेची महाकाली एकता यात्रा र उपत्यका केन्द्रित प्रदर्शन गर्ने निर्णय गरिएको छ । आन्दोलनका लागि समान विचार राख्ने दलहरू, अभियान तथा धार्मिक सङ्घ, सङ्गठन, उद्योगी, व्यवसायी, विभिन्न पेसाकर्मीहरू, बुद्धिजीवी एवं देशभित्र र देशबाहिर रहनुभएका सम्पूर्ण राष्ट्रवादी नेपालीलाई सरिक हुन राप्रपा हार्दिक आव्हान गर्दछ। नवीन राप्रपा कार्य योजनाका बाँकी कार्यहरू पनि आन्दोलनको अङ्गको रूपमा सम्पन्न गर्ने निर्णय गरिएको छ । पार्टीका अध्यक्ष राजेन्द्र लिङदेनको अध्यक्षतामा केन्द्रीय आन्दोलन मूल समिति गठन गरिएको छ र सो समितिमा केन्द्रीय कार्य समितिका सबै पदाधिकारी, केन्द्रीय सदस्यहरू तथा आमन्त्रित केन्द्रीय सदस्यहरू रहनेछन् ।

पार्टीका सङ्गठन विभाग प्रमुख, महामन्त्री डा. धवल शमशेर राणाको संयोजकत्वमा आन्दोलन परिचालन समिति गठन ।पार्टीका कोषाध्यक्ष नीलकण्ठ काफ्लेको संयोजकत्वमा आर्थिक परिचालन समिति गठन । प्रवक्ता तथा प्रचार विभाग प्रमुख मोहनकुमार श्रेष्ठको प्रचार तथा प्रसार समिति गठन । आवश्यकता अनुसारका अन्य समितिहरू गठन गर्ने ।

नवीन राप्रपा कार्ययोजना अन्तर्गत भूगोल केन्द्रित जिम्मेवारीको समीक्षा गर्दा हालसम्मको प्रगति उत्साहजनक रहेकोले कार्यक्रमलाई निरन्तरता दिने र चैत्र मसान्तसम्म म्याद थप गर्ने । आवश्यकताअनुसार जिम्मेवारी हेरफेर गर्ने, जिम्मेवारीमा नजानेलाई सचेत वा कारबाही गर्ने साथै नवीन राप्रपा कार्य योजनाका बाँकी कार्यहरू पनि क्रमशः सम्पन्न गर्ने निर्णय गरिएको छ ।

कोषाध्यक्षबाट प्रस्तुत आर्थिक प्रतिवेदन, सचिवालयका प्रतिवेदन लगायत प्रदेश कार्य समितिका प्रतिवेदनहरू परिमार्जनसहित पारित गर्ने निर्णय गरिएको छ ।

केन्द्रीय कार्य सम्पादन समितिबाट भएका निर्णयहरू अनुमोदन गर्ने निर्णय गरिएको छ ।

जाजरकोट केन्द्रबिन्दु बनाएर गएको भूकम्प प्रभावित परिवारहरूलाई तत्काल पालबाट अस्थायी आवासमा स्थानान्तरण गर्न राप्रपा सरकारको गम्भीर ध्यानाकर्षण गराउँदछ साथै तत्काल अस्थायी आवास निर्माण गर्ने काममा नेपाली सेना र सशस्त्र प्रहरी बललाई जिम्मेवारी दिन नेपाल सरकारसंग राप्रपा माग समेत गर्दछ ।

वित्तीय संस्थाको चर्को व्याज दरका कारण उद्योगी, व्यवसायी र खास गरी साना उद्यमी व्यवसायी तथा किसानहरूको धितो लिलाम हुने परिस्थिति सिर्जना भएकाले उनीहरूको भुक्तानी तालिका कम्तीमा एक वर्ष म्याद थप गर्न र ब्याज दरलाई एकल बिन्दुमा ल्याउन नेपाल सरकार तथा नेपाल राष्ट्र बैङ्कसँग राप्रपा माग गर्दछ ।

उखु किसानले प्राप्त गर्नुपर्ने रकम कुनै विलम्ब नगरी तत्काल उपलब्ध गराउन र दुग्ध किसानले पाउनुपर्ने रकम शीघ्र र सहज रूपमा उपलब्ध गराउन राप्रपा सरकारको ध्यानाकर्षण गराउँदछ।

प्रवासमा रहेका नेपालीले मतदान गर्न पाउने कानुनी अधिकारको सुनिश्चितता सहितको कानुन आगामी संसद्को अधिवेशनबाट पारित गर्ने गरि अविलम्ब संसद्मा पु¥याउन नेपाल सरकार र निर्वाचन आयोगको राप्रपा ध्यानाकर्षण गराउँदछ।

पार्टीको प्रवासको भूमिकालाई उच्च मूल्याङ्कन गर्दै हाल प्रवास क्षेत्रको वैधानिक भूमिकालाई बिस्तार गर्न वरिष्ठ उपाध्यक्ष रवीन्द्र मिश्रलाई अध्ययन गरी प्रतिवेदन दिन जिम्मेवारी दिइएको छ।

एनसेल अजियाटाको शेयर बिक्रीमा भएको भ्रष्टाचारको राप्रपा गम्भीर विरोध गर्दछ। यस विषयमा उच्चस्तरीय छानबिन गर्न राप्रपा जोडदार माग गर्दछ। साथै राप्रपाले पनि पार्टी भित्र अनुसन्धानका गर्नेछ। यसको लागि प्रवक्ता एवं सुशासन विभाग प्रमुख ज्ञानेन्द्र शाहीलाई संयोजक तोकिएको छ ।

लामो प्रतीक्षा पछि पनि मेलम्ची खानेपानीबाट काठमाडौं उपत्यकामा नियमित पानी आपूर्ति हुन नसकेको अवस्थालाई दृष्टिगत गर्दै तत्काल खानेपानी आपूर्तिको व्यवस्था गर्न र मेलम्ची खानेपानी आयोजनामा भएको भ्रष्टाचारको छानबिन गर्न राप्रपा माग गर्दछ ।

स्वास्थ्य बिमा गरेका विमित बिरामीले पाउने उपचार र सुविधा जुनसुकै अस्पतालबाट पाउने व्यवस्था गर्न, औषधिको सुविधा सहजै पाउने वातावरण सुनिश्चित गर्न र सेवा प्रदायक अस्पतालले पाउने भुक्तानी तत्काल उपलब्ध गराउन सरकार र सम्बन्धित निकायको राप्रपा ध्यानाकर्षण गराउँदछ ।

रुस युक्रेन युद्धमा होमिएका नेपाली युवाहरु फिर्ता गर्न तथा हमासको कब्जामा रहेका विपिन जोशी एवं युक्रेनको नियन्त्रणमा रहेका नेपालीहरूको शीघ्र रिहाइको प्रभावकारी कूटनीतिक पहल गर्न नेपाल सरकारको राप्रपा गम्भीर ध्यानाकर्षण गर्ने निर्णय गराउँदछ ।’

बैठकले एनसेल अजियाटाको शेयर बिक्रीमा भएको भ्रष्टाचारको विरोध गर्दै उच्चस्तरीय छानबिन गर्न माग गरेको छ । त्यस्तै रुस युक्रेन युद्धमा होमिएका नेपाली युवाहरु फिर्ता गर्न तथा हमासको कब्जामा रहेका विपिन जोशी एवं युक्रेनको नियन्त्रणमा रहेका नेपालीहरूको शीघ्र रिहाइको प्रभावकारी कूटनीतिक पहल गर्न सरकारसँग आग्रह गर्ने निर्णय गरेको छ ।